Kryetari i Partisë Demokratike, Lulzim Basha ftoi qytetarët në qarkun e Fierit t’i bashkohen protestës së 16 shkurtit në Tiranë “për t’i dhënë fund braktisjes nga qeveria”. Gjatë takimit me fermerë në Frakull, këta të fundit u shprehën se janë mashtruar nga qeveria. Fermerët i thanë kryetarit të PD se nuk kanë marrë asnjë subvencion, asnjë mbështetje nga qeveria këto 5 vjet.
https://www.facebook.com/lulzimbasha.al/videos/2480280788680778/
“Jemi copë-copë. Qeveria na vjen këtu e na mashtro, jemi në mëshirë të fatit”, u shprehën fermerët gjatë takimit me kryetarin e Partisë Demokratike, i cili shpjegoi se shtylla e planit të PD për zhvillimin e bujqësisë është subvencionimi.
“Sektori i bujqësisë është një sektor, i cili nuk mund të mbijetojë pa subvencione. Zgjidhja jonë për fshatin është që të dedikojmë 100 milionë dollarë në vit për subvencione të drejtpërdrejta për fermerët, në mënyrë që edhe ju të nxirrni fitimin e punës suaj, edhe prodhimet tuaja të arrijnë tek konsumatori me një çmim të arsyeshëm. Pra, 50 milionë usd do të shkojnë për infrastrukturën, 100 milionë usd do të jepen si subvencione të drejtpërdrejta”, tha Basha,“si do të fitoni ju, kur ju nuk futeni dot në treg. Unë e di që ju nuk futeni dot as në tregjet e qyteteve, se edhe tregjet e qyteteve i kanë kapur dy duar. Kjo që po ndodh me ju, ka ndodhur me të gjithë tregun. Pra, në kuptimin politik, që të mos ju lodh me shifra, së pari ne do ta shkatërrojmë këtë rrjet oligarkësh, monopolistësh, gjakpirësish, sepse kjo është shkaktarja kryesore e fatkeqësisë suaj dhe e çdo prodhuesi, edhe e prodhuesve të tjerë që nuk jetojnë me tokën. Ne, mjete politike, veç zgjedhjeve, për të ardhur në pushtet, nuk kemi. Por zgjedhje të lira e të ndershme me Niçen, me Gjushin, me Ramën, nuk ka. Kjo është arsyeja që ju kemi thirrur në një protestë në 16 shkurt. Sepse këtë zgjidhje mund ta jepni vetëm ju si popull. Nuk ju kam thirrur për të mbajtur fjalime më 16 shkurt. Nuk kam çfarë t’ju them më. E vetmja gjë që mund t’ju them, është ejani aty, me pjesëmarrjen tuaj, bëni atë që bën çdo popull europian: deklaroni fundin e këtij regjimi dhe të hapim rrugën për një zgjidhje politike”.
Gjatë qëndrimit në Frakull, Basha pa kushtet në një serë me luleshtrydhe dhe dëgjoi nga pronarët e serave për braktisjen e plotë nga qeveria. Përveç mungesës së subvencioneve, ata pohuan se çmimi i naftës e dëmton rëndë biznesin.
“Si ai që bredh me X6 dhe unë që punoj tokën time, paguajmë 1.700 lekë litrin e naftës dhe nuk marrim asnjë lloj ndihme nga shteti”, u shpreh një fermer, i cili ngriti zërin edhe për dëmin që i shkaktohet prodhimit nga plehrat kimikë të skaduar: “Konsumatori nuk e ha dot këtë luleshtrydhe këtu, sepse kjo është spërkatur 10 herë, sepse helmi nuk bën efekt.”
Basha shpjegoi se subvencionimi direkt i fermerit do të ndikojë menjëherë tek cilësia e prodhimit, sepse edhe plehrat kimikë do të këtë mundësi t’i blejë nga më cilësorët me paratë që financon buxheti për ta.
Lulzim Basha i dha përgjigje edhe dilemës së mijëra shqiptarëve, e cila i erdhi si pyetje nga fermeri i Frakullës: Të rrimë në këtë vend apo të marrim familjen e të arratisemi një orë e më parë.
“Synimi kryesor i programit tonë është punësimi dhe ju, nëpërmjet aktivitetit tuaj siguroni punësim, pra meritoni mbështetje. Ju kërkoni mundësi. Me këtë qeveri nuk i keni patur, por me ne do t’i keni këto mundësi. Mesazhi që dua të të jap sot është një mesazh shprese tek e nesërmja, jo t’i mbyllësh gjërat e të ikësh, por të qëndrosh, të përballemi dhe të merrni atë që është e juaja dhe ju takon”, tha Basha. /Boldnews.al/
