Policia e Durrësit ka zbardhur vrasjen e ish-kryeplakut të fshatit Manëz në Durrës, Mirosh Djaloshi, ngjarje e ndodhur më 18 mars të këtij viti. Sipas bluve të qytetit bregdetar, Mirosh Djaloshi 54 vjeç dyshohet se është vrarë nga dy djemtë dhe bashkëshortja e tij.
Kështu, janë ndaluar autorët e dyshuar Arban Djaloshi 26 vjeç, i dënuar më parë për vjedhje, F. Djaloshi 16 vjeç, vëllai i Arban Djaloshit dhe Bardhe Djaloshi 46 vjeçe. Policia thotë se motivi i vrasjes ka qenë për konflikte familjare, por nuk jep informacione të tjera për shkak të sekretit hetimor.
54-vjeçari Mirosh Djaloshi u gjet i vdekur në oborrin e banesës së tij, i goditur me sende të forta në kokë. Ai u konstatua në mëngjes nga familjarët e tij, të cilët njoftuan policinë. Por, hetimet zbuluan se ish-kryeplaku mund të jetë vrarë pikërisht nga familjarët e tij.
