Përpara Komisionit të Sigurisë për çështjen e ekzistencës së pajisjes së përgjimeve në Policinë e Shtetit, raporton edhe Ministri i Brendshëm, Sajmir Tahiri.
Ky i fundit mohoi se ekziston një pajisje përgjimi telefonik në Policinë e Shtetit. Duke devijuar shpesh nga biseda, Ministri Tahiri i tha Komisionit të gjitha arritjet e Policisë së Shtetit. Mirëpo u ndërpre nga Flamur Noka i cili i tha se interesi i Komisionit është pajisja e përgjimit dhe jo analiza e Policisë së Shtetit. Lidhur me pajisjen Tahiri tha se Policia dispozon pajisje trajnimi në Polici.
“Cdo pajisje trajnimi që përdor Policia e shtetit është e ligjshme. Mund tju ftojmë që të vini gjatë trajnimeve me këto pajisje. Çdo gjë tjetër është zhurmë e mediave”, tha Tahiri.
Më pas Tahiri tha se kjo çështje po hetohet nga Prokuroria e Përgjithshme dhe ajo do të ketë në fund të hetimit një përgjigje.
“Prokuroria ka një çështje hetimore. Jam e bindur që kjo prokurori do kthej përgjigje. I kam vënë në dispozicion veten time dhe çdo gjë që ka lidhje me hetimin. Mund tju garantoj që Policia e Shtetit nuk ka shkelur dhe nuk do e shkeli ligjin.
Biseda mes Nokës dhe Tahirit për devijimin e diskutimit:
Tahiri: Përpjekja për të rilindur pololicinë e shtetit ishte që ta nisnim nga akademia e sigurisë.
Noka: Nuk i duhet askujt analiza e punës së policisë së Shtetit, këtu flisni për çështjen e pajisjes.
Tahiri: Nuk ju marr leje
Noka: Këtu do më marrësh mua leje. Nëse i keni lyer muret e akademisë me ngjyrë të kuqe apo jo ne nuk na intereson këtu tani.
