Ndryshe nga herët e tjera, kur ministri i Brendshëm Saimir Tahiri reagonte i pari për operacione të suksesshme të policisë shqiptare në bashkëpunim edhe me partnerët e huaj, vazhdon të mos ketë asnjë deklaratë për rastin e Klemend Balilit, i cilësuar nga mediat greke dhe Partia Demokratike se është “Escobari i Ballkanit”.
Duke folur për mediat jashtë Akademisë së Sigurisë, ministri Tahiri i pyetur nga gazetarët tha se mendon njësoj si kolegu i tij Ylli Manjani.
“I bashkohem kolegut tim Manjani. Duhet të pyesni Prokurorinë”, tha shkurt Tahiri për këtë çështje.
Më herët gjatë ditës së sotme, ministri i Drejtësisë Ylli Manjani tha se nuk ka dijeni për arratisjen e Klemend Balilit, por është në dijeni që Prokuroria po kryen hetime për këtë rast dhe duhet të pyetet organi i akuzës.
Kujtojmë që hetimet për organizatën e drogës që drejtohej nga Baroni i Ballkanit zhvillohen prej më shumë se 1 viti nga Policia Greke dhe DEA amerikane, ndërsa Policia Shqiptare është informuar në muajin mars të këtij viti rreth këtyre hetimeve.
