Një pako e dyshimtë ka bërë që autoritetet të japin alarmin e kuq, ndërsa të gjithë tifozët u evakuuan nga shkallët e stadiumit “Old Trafford”. Kështu, ndeshja mes Manchester United dhe Bournemouth është anuluar për arsye sigurie. Sipas mediave britanike, në stadium është gjetur një pako e dyshimtë, duke detyruar që njësitë speciale të marrin situatën nën kontroll.
Po ashtu, po përdoren dhe qentë. Fillimisht u njoftua se ndeshja do të shtyhet 45 minuta dhe pa dhënë shumë detaje, 20 mijë persona u detyruan të lënë stadiumin. Pas bisedave mes gjyqtarit kryesor të ndeshjes dhe zyrtarëve të United, edhe lojtarët janë urdhëruar të futen sërish brenda në dhomat e zhveshjes. Sfida e javës së fundit duhej të fillonte në ora 16:00.
