Përdhunimi dhe dhunimi i shqiptares 27-vjeçare, Besjana Kosturi në kryeqytetin Italian, nga dy agresorë ka bërë që me qindra italianë të protestojnë në mbështetje të vajzës shqiptare, raporton portali Via Vai.
Rreth një javë më parë vajza u rrëmbye dhe më pas u ushtrua dhunë ndaj saj duke e përdhunuar në një kamp romësh në kryeqytetin italian. Besjana arriti t`i shpëtojë agresorëve të cilët, sipas saj, donin ta vrisnin me arsyen që ngjarja të mos merrej vesh nga policia.
Një pjesëmarrje e madhe kryesisht nga italianët ka suprizuar edhe babain e 27-vjeçares, ish-profesorin Vladimir Kosturi që organizoi këtë protestë.
Siç shprehet vetë Kosturi kjo mbështetje nga qytetarët italianë i ka dhënë forcë familjes.
“Jam krenare për ty bija ime, askush nuk duhet të vërë dorë ndaj grave. Populli i mrekullueshëm italian nuk e la vetëm sot BESJANEN. Erdhën me mijëra nga te gjitha anët e Romes, ndërsa shqiptaret qe telefonova u tremben prej shiut. Kjo na bën të harrojmë ngjarjen e tmerrshme dhe të gjejmë forcë për të ecur përpara”-shprehet Kosturi në një postim në FB ku njofton gjithashtu se protesta e radhës do të mbahet në 6 qershor.
Vetë Besjana morri megafonin për të falënderuar për solidaritetin banorët e lagjes dhe veçanërisht mbështetësit dhe anëtarët e lëvizjes politike italiane Casapound që njihet si një grupim radikal i së djathtës.
“Dua të falënderoj Simone Di Stefano dhe të gjithë djemtë e tij për solidaritetin që treguan sot me ne, të vetmit që na mbështetën pavarësisht se etiketohen me të padrejtë si racistë dhe të dhunshëm vetëm sepse luftojnë kriminalitetin në vendin e tyre.
Unë jam shqiptare, e megjithatë ata më mbështetën. A nuk ju duket e pabesueshme, Casapound në mbështetje të një shqiptareje ndërsa të majtët donin të na mbyllnin gojën. Unë s’kam asnjë interes që t’i bëj reklamë, sepse as nuk votoj, doja vetëm të jepja dëshminë time. Faleminderit Casapound. Ju përqafoj me zemër”.
Fillimisht 27-vjeçarja nuk u tregoi prindërve se çfarë kishte ndodhur, por vendosi të bëjë denoncimin në polici. Kur kanë kaluar disa ditë nga ngjarja, Besiana është më e qetë dhe inkurajon të gjitha vajzat të denoncojnë ngjarje të tilla dhe të mos zmbrapsen nga turpi. Policia italiane ka arrestuar një prej dy agresorëve dhe ka shpallur në kërkim bashkëpunëtorin e tij.
