Gjykata Kushtetuese ka vendosur sot t’i heqë mandatin deputetit socialist të Vlorës, Koço Kokëdhima.
Kështu Kushtetuesja ka gjetur papajtueshmëri pas kërkesës së opozitës, e cila akuzoi Kokëdhimën për përfitimin e parave publike nga tenderat. Sipas PD, Kokëdhima në shkelje të Kushtetutës ka përfituar fonde publike nëpërmjet kompanisë Abissnet.
Partisë Demokratike dekalaroi se neni 70 i Kushtetutës qartësisht e detyron deputetin Koço Kokëdhima që të zgjedhë midis mandatit të deputetit apo aksionerit të kompanive që përfitojnë fondet publike, duke i konsideruar të dy funksionet si të papajtueshme me njëra-tjetrën. Kokëdhima ka shprehur se këtë kompani e ka shitur.
Në analizat e kryera rezulton se deputeti Kokëdhima përmes shoqërisë “Abissnet sh.a” ka përfituar 150 tendera publikë. PD ka kërkuar heqjen e mandatit edhe për dy deputetë të tjerë të PD, Valentina Leskajn dhe Rakip Sulin.
VENDIMI
Gjykata Kushtetuese e Republikës së Shqipërisë, në datën 09.05.2016 shqyrtoi çështjen me palë:
Kërkues: Kuvendi i Republikës së Shqipërisë
Subjekt i interesuar: Deputeti Koço Kokëdhima
Objekt: Konstatimi i papajtueshmërisë me mandatin të deputetit Koço Kokëdhima.
Gjykata Kushtetuese, pasi shqyrtoi dhe analizoi pretendimet e ngritura nga kërkuesi si dhe prapësimet e paraqitura nga subjekti i interesuar, në mbështetje të nenit 131/e të Kushtetutës, si dhe të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”,
VENDOSI:
– Konstatimin e papajtueshmërisë së mandatit të deputetit Koço Kokëdhima.
Pas largimit të Kokëdhimës nga parlamenti, vendin e tij do ta zërë kreu aktual i PS Vlorë, njëkohësisht drejtori i Portit, Edmond Leka.
