Nga Boldnews.al
Prokuroria e Përgjithshme deklaroi zyrtarisht se autoritetet italiane kanë refuzuar që të kryejnë ekspertizën e zërit të Agron (Geron) Xhafaj, i cili shfaqet në një audio-regjistrim duke folur për kryerjen e trafikut të narkotikëve.
Termi “refuzim”, i përdorur zyrtarisht nga Prokuroria e Përgjithshme, nëse është vërtetë kështu, shënon rastin e parë kur një autoritet i huaj refuzon ndihmën juridike të kërkuar nga autoritetet shqiptare.
Praktika e institucioneve shqiptare ka njohur raste kur agjencitë homologe nuk kanë marrë përsipër plotësimin e kërkesës për ndihmë juridike, për shkak të mungesës të ekspertizës së kërkuar. Por, në asnjë rast nuk është shënuar “refuzim” i kërkesës për ndihmë juridike, pasi kjo nuk është as në frymën e Konventave ndërkombëtare, ku është palë edhe Shqipëria, edhe Italia.
Në rastin konkret, ka dy mundësi: ose termi “refuzim” i përdorur nga Prokuroria e Përgjithshme në njoftim zyrtar është një lapsus ose me të vërtetë institucioni shqiptar i Akuzës është përballur me refuzimin e autoriteteve italiane.
Nëse termi “refuzim” është një lapsus i Prokurorisë, atëherë ata do të duhet të sqarojnë më së pari Ambasadën Italiane në Tiranë për shprehjen e papërshtatshme që kanë përdorur zyrtarisht.
Por, nëse “refuzimi” për kryerjen e ekspertizës është i vërtetë, atëherë, Ambasada Italiane në Tiranë duhet të shpjegojë se përse agjencitë ligjzbatuese të fqinjit tonë përtej detit kanë refuzuar të ekspertojnë zërin e vëllait të Ministrit të Brendshëm, Fatmir Xhafaj.
Në të dy rastet, ose Prokuroria e Përgjithshme ose Ambasada Italiane, ose edhe të dyja bashkë duhet të sqarojnë nëse “refuzimi” është vërtetë i tillë dhe nëse përse ky “incident diplomatik” pikërisht në rastin e ekspertimit të zërit të Agron (Geron) Xhafaj.
Partia Demokratike, e cila bëri publike audio-regjistrimin Alfred Veliut nga selia e saj, ka një qëndrim tjetër për përgjigjen e autoriteteve italiane mbi ekspertizën e zërit të Agron Xhafaj. Sipas zyrtarëve opozitarë, autoritetet italiane kanë konstatuar ngjashmëri shumë të lartë ndërmjet zërit të Agron Xhafaj të marrë si model eksperimental nga Prokuroria me zërin që bashkëbisedon me shtetasin Albert Veliu për trafik narkotikësh.
Duke mbajtur këtë qëndrim, Partia Demokratike shprehet se Prokuroria, nën ndikimin total të ministrit të Brendshëm, Fatmir Xhafaj, nuk e ka pranuar këtë rezultat të autoriteteve italiane dhe ka dërguar mostra zëri të një cilësie shumë të dobët në një laborator anglez.
Edhe ky i fundit nuk ka arritur të dalë në përfundime të qarta nëse përputhet apo jo zëri i Agron Xhafaj dhënë në mes të natës në Prokurori, me zërin në audio-regjistrim.Por, pavarësisht se nuk ka një përgjigje të qartë, Prokuroria për Krime të Rënda e ka shfrytëzuar atë përgjigje të pjesshme të laboratorit britanik për të urdhëruar arrestimin e denoncuesit të trafikut të narkotikëve, si i dyshuar për veprën penale të “Kallëzimit të rremë”.
