Një grabitje ka ndodhur rreth orës 16:00 të ditës së sotme në Tiranë, në hyrje të hotel Sheratonit në Tiranë. Dëshmitar i kësaj ngjarjeje duket se ka qenë edhe gazetari Artan Hoxha. Ky i fundit duke treguar ngjarjen, u shpreh se “ngjarja fillimisht u duk se ishte një skenë filmi, por më pas dy personat të cilëve u mor çanta filluan të bërtisnin”.
“Isha duke dalë aty, pashë dy persona që kishin një çantë në dorë. Ata dolën nga hoteli ku ndodhet një bankë, ku kishin marrë edhe lekët. Sapo ata kanë dalë jashtë hotelit, një person i maskuar dhe me armë në dorë u ka dalë para dhe ka bërtitur. Mënjeherë u ka rrëmbyer çantën që njëri prej atyre kishte në dorë.
Më pas menjëherë ai ka ikur me vrap dhe ka hipur në një motor me fuqi të vogël. Menjëherë personat që kishin çantë filluan të bërtisnin dhe aty u kuptua se ishte një grabitje. Ata njoftuan policinë dhe aty u bllokua e gjitha. Nga dëshmitë u mësua se kambisti që kishte tërhequr lekët është një personazh i njohur, ka një pikë këmbimi tek bulevardi “Zogu i Parë”, u shpreh gazetari Artan Hoxha në News24.
