Kryetari i Partisë Socialiste Edi Rama nuk ka propozuar emrin e deputetit Ben Blushi si pjesë e kryesisë së kësaj force politike, duke eleminuar kështu një nga zërat kundër të kësaj mazhorance.
Ben Blushi u zëvendësua në kryesi nga mbështetës të zotit Rama, ndërkohë që Partia Socialiste është tronditur sërish brenda radhëve të saj. Kjo pasi Arta Dade dhe Namik Dokle janë dorëhequr nga kandidimi për kryesinë e Partisë Socialiste, si një shenjë revolte ndaj kryetarit Edi Rama për mënyrën sesi po zhvillohet procesi.
Dade është shprehur se “në zhvillimet e fundit parimet e PS-së kanë rënë ndesh me parimet e mia.”
Jashtë dyerve të Xibrakut u shpreh edhe deputetja e Qarkut Shkodër, Mimoza Hafizi e cila vlerësoi aktin e dorëheqjes së Dades dhe Dokles.
“Dorëheqja e Dades, akt fisnik, dhe protestë për gjithçka ka ndodhur në PS dhe do të ndodhë.”– u shpreh Hafizi.
E pyetur për projekt-rezolutën e për referendumin e PS, Hafizi u shpreh Asambleja nuk e pranoi, madje nuk u morr asnjë vendim.
“Asambleja e përcakton rendin e ditës. Kërkesa nuk u pranua as të hidhej në vendim. Na u tha që nuk mund të futet në rendin e ditës një kërkesë që ka ardhur dje. Ndërkohë që është normale edhe po ta sillja sot. Ne do vijojmë ta kërkojmë në KZI, nga asambleja donim mbështetjen. Nuk donim që kjo kërkesë të kishte fatin e kërkesës që çuam në komisionin për garancitë statutore.” – u shpreh më tej Hafizi.
Më herët, Boldnews.al publikoi projekt-rezolutën e deputetëve Blushi-Hafizi për referendumin e 9 prillit që do iu dërgua sot Asamblesë Kombëtare të PS. (Shkarko rezolutën)
Boldnews.al
