Pak kohë pas uljes të avionit me të cilin udhëtonte zëvendës/presidenti i parë i Afganistanit, Rashid Dostum, në relacionin Ankara-Kabul, në afërsi të aeroportit të kryeqytetit afgan ndodhi një shpërrthim.
Ministria e Shëndetësisë e Afganistanit njoftoi se në shpërthim kanë humbur jetën të paktën 11 persona, ndërsa janë plagosur 48 të tjerë.
Zyrtarët shprehën shqetësimin se numri i të vdekurve dhe të plagosurve mund të rritet.
Një nga këshilltarët e Dostum tha për agjencinë e lajmeve “Anadolu Agency” se mes të vdekurve gjenden edhe turprojat e zëvendëspresidentit të parë afgan, Dostum.
Dostum qëndroi rreth një vit në Turqi, para se të kthehej në Atdhe këtë të diel, ndërsa në aeroport kishin dalë disa zyrtarë lokalë dhe përkrahësit e tij për ta mirëpritur. Shpërthimi ndodhi menjëherë pas nisjes së autokolonës në të cilën ndodhej Dostum.
Pas incidentit, Dostum tha për gazetarët se në shpërthimin që ndodhi si rezultat i një sulmi vetëvrasës, sipas vlerësimeve të para nëntë persona nga punonjësit e sigurisë të cilët e mbronin atë kanë humbur jetën, ndërsa ka edhe të plagosur.
Askush menjëherë nuk mori përgjegjësinë për shpërthimin, por si talebanët ashtu edhe grupi i Shtetit Islamik janë aktivë në kryeqytetin afgan.
Zëvendës presidenti dhe gjenerali Abdul Rashid Dostum dyshohet se ishte objektivi i sulmit, thuhet në raportimet e disa mediave ndërkombëtare.
