“Boldnews.al” ka siguruar argumentat e Prokurorisë së Durrësit për sekuestrimin e ish-hotel “Vollga”, një pjesë e të cilit i është “dhuruar” Emiljano Shullazit, i arrestuar nën dyshimin për gjobvënie dhe disa vepra të tjera të rënda penale.
Ditën e martë, gjykata e Durrësit pranoi kërkesën e Prokurorisë për të vendosur sekuestro preventive ndaj godinës dhe truallit të ish-hotel “Vollga” në qendër të qytetit, pasi ekzistojnë dyshime se tjetërsimi i pronësisë së tij është kryer me anë të veprave penale të “Shpërdorimit të detyrës”, “Fallsifikimit të dokumentave” dhe “Pastrimit të produkteve të veprës penale”.
Në argumentat e prokurorisë, dorëzuar para gjykatës dhe të siguruara nga “Boldnews.al”, konstatohen shkeljet e renditura si më poshtë:
– Paligjshmëri në veprimet e kryera mbi ndryshimet e pronësisë, ku vihet re se, edhe me vendim gjykate të formës së prerë të vitit 2014, është konstatuar fakti i falsitetit të dokumentit të vërtetimit hipotekor e shënimet e vendosur në hipotekë për pasurinë objekt kallëzimi. Po ashtu, me vendim gjykate është pranuar edhe falsiteti i dokumentit të prokurës së bërë në Selanik për një shtetas që pretendon se është përfaqësues i trashëgimtares së ligjshme të pronës, Alie Fortuzi.
– Paligjshmëri në lëshimin e çertifikatave të pronësisë në vitin 2014, në kohën kur nga ana e Gjykatës së Lartë është vendosur pezullimi i ekzekutimit të vendimit të Gjykatës së Apelit të dhënë në favor kallëzuesit në vitin 2014;
– E në vazhdim me tjetërsimin e po kësaj prone në vitin 2014, – veprime këto zinxhir që kanë patur për qëllim mbulimin e veprimeve të paligjshme të kryera për përfitimin e pasurisë, nëpërmjet veprimeve të tjetërsimit që gjithsesi shfaqin dyshime për paligjshmëri.
Prokuroria i pretendon këto shkelje, duke shtuar se paligjshmëritë lidhen edhe me faktin se prona është blerë nga shtetasi Fejzi Kodra, duke u depozituar një shumë cash që është tepër e konsiderueshme dhe që nuk ka të dhëna të qarta lidhur me mundësimin e të pasurit të kësaj shume nga ky shtetas.
Gjithashtu vihet re se nga shtetasi Ylvi Beqja, administrator i pronarit të pretenduar “Saudi Brothers….” është dhuruar një sipërfaqe trualli prej 749.6m2 dhe ndërtesë prej 1129.39 m2, që janë pjesë pikërisht e sipërfaqes së truallit që shtetasi Ylvi Beqja i ka shitur shtetasit Fejzi Kodra.
Kjo sipërfaqe që ka një vlerë tepër të madhe mbi 671,000 euro, shtetasi Ylvi Beqja ia dhuron pa asnjë llogjikë të qartë një shtetasi, i cili është me precedentë kriminal. Pikërisht këto veprime shitje e dhurimi nga shtetasi Ylvi Beqja të një pasurie që duke qenë në konflikt me kallëzuesin arrin të bëjë regjistrimin e pronës dhe që ka një vlerë tepër të lartë në lekë, krijojnë dyshime mbi veprime të kundraligjshme që konsistojnë në zhdukjen e origjinës së kësaj prone dhe vënien në dispozicion të saj të personave me precedent kriminal nëpërmjet ‘dhurimit’ të dyshuar, e krijimin kështu të dyshimeve për kryerjen e veprës penale të parashikuar nga neni 287 i K.penal.
