Nga Boldnews.al
Komisariati nr.1 në Tiranë, i drejtuar nga Ervin Hasrama, ka marrë përsipër të luajë rolin e “të fortit” me protestuesit paqësorë, të cilët kërkojnë prej më shumë se dy muajsh dorëheqjen e kryeministrit Edi Rama.
Ditën e Hënë (27 Korrik 2026), një dyzinë qytetarësh, të “armatosur” vetëm me fjalën e lirë, u tërhoqën zvarrë nga efektvët e Policisë së komisariatit nr.1, duke nxitur një reagim të ashpër publik, por edhe një pikëpyetje mbi mënyrën se si organizon punë shefi i tyre, Hasrama.
Pak ditë më parë, i njëjti drejtues, kësaj radhe në vetë të parë, u përfshi në “rrëmbimin” dhe mbajtjen për shumë orë në komisariat të gazetares Vjolanda Peca. Kolegia ishte në krye të detyrës, duke raportuar mbi protestën e të Enjtes së kaluar para Parlamentit.
Pa respektuar asnjë procedurë standarde, asnjë protokoll, asnjë plan masash, shefi i Komisariatit kishte urdhëruar vartësit e tij që të reagonin vetëm me forma agresive- përdorimin e ujit me piper përballë protestuesve paqësorë, tërheqjen zvarrë të tyre dhe, as më shumë e as më pak, dhunimin e qytetarëve.
Natyrisht, përballë “kërcënimit politik” të krye-shefit, Edi Rama, drejtuesi i Komisariatit nr.1, Ervin Hasrama, ka marrë përsipër që të luajë rolin e “brutalit” përballë qytetarëve. Me një servilizëm të tejskajshëm, Hasrama duket se i është betuar kryeministrit për një besnikëri absolute, pa marrë parasysh aspak rregullimet ligjore, etike dhe proceduriale mbi mënyrën se si menaxhohen protestat paqësore.
Në Tiranë ka 7 komisariate, përfshirë edhe atë të Krujës. Por, vetëm në Komisariatin nr. 1 mblidhen në mënyrë periodike protestuesit paqësorë, të cilët kërkojnë lirimin e miqve e shokëve të tyre.
Kjo, nuk ndodh vetëm për faktin se ky komisariat mbulon territorin ku gjendet godina e Parlamentit.
Ndodh për faktin se Ervin Hasrama, me shumë mundësi, ka dalë garant politik që të zbehë sa të mundi protestën qytetarë, nëpërmjet dhunës e terrorit.
Kjo qasje e shndërron Hasramën në shembullin më të keq të një drejtuesi policie.
