Seanca plenare e Kuvendit është shoqëruar me tensione këtë të hënë, pasi deputetët e Partisë Demokratike bllokuan foltoren në shenjë kundërshtimi ndaj procedurës së ndjekur për shqyrtimin e marrëveshjes së bashkëpunimit me Shtetet e Bashkuara të Amerikës në fushën e mbrojtjes.
Kryetari i Kuvendit, Niko Peleshi, vendosi që projektmarrëveshja të shqyrtohej me procedurë të përshpejtuar, duke njoftuar ndërprerjen e seancës dhe rinisjen e saj në orën 15:00, pasi dokumenti të diskutohet fillimisht në komisionet parlamentare.
“Në rendin e ditës është miratimi, në parim, i marrëveshjes së huas direkte ndërmjet Republikës së Shqipërisë, përfaqësuar nga Ministria e Financave, dhe Shteteve të Bashkuara të Amerikës, përfaqësuar nga Agjencia e Bashkëpunimit për Sigurinë e Mbrojtjes (DSCA), në kuadër të Financimit të Jashtëm Ushtarak (FMF), me një hua në shumën totale prej 302,000,000 (treqind e dy milionë) dollarësh amerikanë”, tha Peleshi.
Vendimi u kundërshtua nga deputetët demokratë, të cilët bllokuan foltoren dhe penguan vijimin normal të punimeve. Pas përplasjeve në sallë dhe situatës së tensionuar, seanca u mbyll.
