Nga Boldnews.al
“Thuaj Eneas që t’i tregojnë një apartament tek godina tek ‘Mine Peza’. …Me Enean mund ta zgjidhë këtë punë”. Bashkëbiseduesit që komunikojnë me mesazhe në gusht të vitit 2020 janë Luçiano Koçeku dhe Ervin Koçeku.
I pari, i njohur edhe me emrin Artur, konsiderohet si një nga bosët e “Grupit Aruba”, përgjegjës për trafikimin e tonelatave kokainë nga Amerika Latine drejt Europës. I dyti është vëllai i tij më i vogël, i cili menaxhonte paratë dhe kontaktet me njërëzit për shitjen e pronave të paluajtshme në kulla e resorte, të dyshuara se vinin nga aktiviteti kriminal.
Personazhi “Enea” është Enea Mitrushi. Ai është administrator i kompanisë “Nova Construction”, në pronësi të Ilir Shtufit, e cila ka ndërtuar, ndër të tjera, një godinë të lartë në rrugën “Mine Peza”, në Tiranë. Enea është një i punësuar dhe, të paktën deri më tani, nuk është konsideruar përgjegjës për “pastrimin e parave”.
Ai ka qenë i ngarkuar me menaxhimin e kompanisë së Ilir Shtufit. Me shumë mundësi, atij i kanë thënë që duhet t’i përgjigjej porosive dhe “urdhërave” të Luçiano Koçekut, i cili për Prokurorinë e Posaçme konsiderohet si njeriu që lëvizje në hije prej shumë vitesh projektet ndërtimore të “Nova Construction”.
Enea mund të jetë një individ me aftësi të mira menaxheriale dhe nuk ka pasur asnjë përgjegjësi të verifikojë statusin, aktivitetin apo burimin e parave të Luçiano Koçekut.
Megjithatë, Prokuroria e Posaçme ka një përcaktim për Enea Mitrushin: Ai konsiderohet si “njeriu i besuar i Luçiano Koçekut”, një prej bosëve të “Grupit Aruba”.
Dhe, si një “njeri i besuar”, emri i tij gjendet në administrimin e disa kompanive ku gjendet dyshja Shtufi-Koçeku, përfshirë edhe në shoqërinë që po zhvillon “investimin strategjik” për ndërtimin e një kompleksi vilash luksoze në Korçë.
“Green House Resort” e Agim Zeqos
Në Prill të vitit 2019, tre biznesmenë të njohur në fushën e ndërtimit, Agim Zeqo, Gerian Kuka dhe Ilir Shtufi, bashkohen dhe krijojnë kompaninë “Investment and Development Albania”, me një ndarje të aksioneve 40-30-30. Ortakët vendosin që administrator do të jetë njëri prej tyre, Ilir Shtufi.
Në Shkurt të vitit 2023, Komiteti i Investimeve Strategjike (KIS), i drejtuar nga kryeministri Edi Rama, i jep kompanisë “Investment and Development Albania” statusin e “investitorit strategjik për projektin “Green House Korça Resort”.
Zona e zhvillimit gjendet në një zonë shumë të preferuar të Korçës, pranë kompleksit sportiv, ku gjendet edhe stadiumi futbollit.
Në vendimin e nënshkruar nga Rama thuhet se “projekti parashikon ndërtimin strukture turistike elitare që do të ketë në përbërje një hotel me 5 (pesë) yje, me kapacitet total prej 94 dhomash, restorante, bare, SPA etj”. Vlera e investimit parashikohet në 18 milionë euro.
Pak muaj më pas, në Shtator të vitit 2023, dy nga ortakët e “Investment and Development Albania-IDA”, Ilir Shtufi dhe Gerian Kuka, vendosi të shesin aksionet e tyre tek Agim Zeqo, i cili merr në kontroll pronësinë dhe administrimin e kompanisë.
Zeqo është i njohur në Korçë, jo vetëm për origjinën e tij nga ky qytet, por edhe për faktin që për shumë vite ishte një nga drejtuesit e ekipit të futbollit “Skënderbeu”.
Përfitimi nga ana e tij e statusit të investitorit strategjik shumë pranë qendrës së qytetit, përveçse u prit me rrudhje buzësh nga qytetarët, nuk u ka aspak e habitshme. Kjo, për shkak të raporteve të mira të tij me kryeministrin Edi Rama.
Edhe resorti hotelier, në publikun lokal, u emërtua si “hoteli i Agim Zeqos”.
Rama i fal tokë publike
Në vendimin e Komitetit të Investimeve Strategjike, thuhej se projekti do të zhvillohej në një hapësirë 10 mijë metra katrorë.
Në një paragraf të mëtejshëm, akti i nënshkruar nga Rama, citonte: “Pasuria e paluajtshme me sipërfaqe prej 10,000 m2, e llojit “truall”, në zonën kadastrale 8561, me numër pasurie 1/911, në pronësi të Bashkisë Korçë ka kaluar në administrim të Ministrisë së Turizmit dhe Mjedisit (MTM) me VKM Nr. 301, datë 19.5.2021”.
Pra, dukej qartë, që trualli ku do të zhvillohej resorti, ishte në pronësi publike.
Dy vjet më pas, në qershor 2025, Këshilli i Ministrave, i drejtuar nga zëvendësja e Edi Ramës në atë kohë, Belinda Balluku, miraton vendimin që i hap rrugën nënshkrimit të kontratës për t’i dhënë me qiranë simbolike 1 euro shoqërisë “Investment and Development Albania”, sh.p.k. një sipërfaqe prej 10 mijë metrash katrorë tokë shtetërore në Bashkinë Korçë.
Pra, në qershor të vitit të kaluar, u kompletua i gjithë cikli. Kompania, që drejtohej nga Agim Zeqo kishte përfituar statusin e investitorit strategjik, mori edhe tokën publike me qira “1 euro” dhe çdo gjë ishte gati për të nisur nga puna.
Rikthimi i Shtufit
Por, pas kompletimit të ciklit, e konkretisht në korrik të vitit 2025, në kompaninë investitore rikthehen sërish ortakët e larguar-Ilir Shtufi dhe Gerian Kuka.
Struktura e aksioneve është e njëjta si në fillim, ku Agim Zeqo zotëron 40 përqind, ndërsa dy bashkëortakët ndajnë nga 30 përqind secili.
Për disa muaj, Agim Zeqo vijon të mbajë postin e Administratorit të kompanisë “Investment and Development Albania”.
Në mars të vitit 2026, asambleja e ortakëve vendos që të emërojë administrator Enea Mitrushin, personazhi që mban të njëjtën detyrë tek “Nova Construction” e Ilir Shtufit dhe që në dosjen e SPAK-ut për “Grupin Aruba” konsiderohet si “një nga njerëzit e besuar të Luçiano Koçekut”.
Të dhënat e deritanishme hetimore nuk tregojnë për ndonjë përgjegjësi penal në ngarkim të dy prej tre ortakëve të kompanisë së “investimit strategjik”, Agim Zeqo dhe Gerian Kuka. Gjithashtu, dosja hetimore nuk ka evidentuar ndonjë përgjegjësi për Enea Mitrushin.
Ajo që njihet deri më tani është fakti që biznesmeni Ilir Shtufi është në kërkim, pasi ndaj tij Gjykata e Posaçme ka caktuar masën e sigurimit “arrest me burg”, nën dyshimet se ka kryer veprat penale të “pastrim të produkteve të veprës penale” në kuadër të “grupit të strukturuar kriminal”.
LEXO EDHE:
Qeveria i fal 10 mijë m² tokë “strategjikut” Agim Zeqo në Korçë për resortin luksoz 18 mln euro
