Aktivistja Sidorela Vatnikaj denoncoi sot fjalimin e Edi Ramës në grupin e PS si një gënjeshtër, teksa i kërkoi publikisht që të anulonte ligjin e investimeve strategjike, zonave të mbrojtura dhe anulimin e Paketës së Maleve.
Ajo kërkoi një qeveri teknike dhe zgjedhje të lira ku të vendosnin qytetarët.
“Nuk jemi këtu si pjesë e disa shtresave arsimore dhe ekonomike, as përkatësi fetare, por si pasojë e një sistemi 35-vjeçar që na ka shkelur e varfëruar. Ndaj çdo thirrje këtu të jetë në kuadër të mllefit e revoltës që na përfaqëson të gjithëve. Sot Rama u përpoq të na mbushte mendjen se ky shesh ishte pasqyra ku qeverisja të shihte veten. E ka gabim, nuk është pasqyrë për të po për shoqërinë shqiptare, te e cila pa se nuk është e gjitha hajdute dhe kriminele”, tha ajo mes të tjerash.
Aktivistja i dha edhe një përgjigje nga sheshi i protestës kryeministrit.
“Në përgjigje të monologut të gjatë po i kthej përgjigje të shkurtër. Jemi këtu për të kërkuar dorëheqjen e kryeministrit Rama dhe qeverisë. Së dyti Rama gënjeu kur tha se ka arritur përafrimin e legjislacionit mjedisor, Rama anulo ligjin për ndryshimet që ke bërë për zonat e mbrojtura. Anuloje ligjin. Edi Rama gënjeu kur tha se Paketa e Maleve do jetë shpronësim për ata që jetojnë atje, ne e dimë që do jetë privatizim, ndaj t’i themi anulojë ligjin. Gjithashtu për 55 ditë po kërkojmë shfuqizimin e ligjit të investimit strategjik për ata që marrin tokat tona, bregdetin dhe malet, ndaj edhe sot i kërkojmë anuloje ligjin”, vijoi Vatnikaj.
Në fund aktivistja u shpreh se qëndresa në shesh do vijonte deri në dorëhqejen e qeverisë, zgjedhje të lira, qeveri teknike dhe një Shqipëri të re.
“Rama dhe kushdo tjetër duhet ta dije se asnjë qeveri dhe kryeministër nuk na lëviz nga ky shesh. Nuk pranojmë modifikime në qeveri, të dorëhiqen të gjithë. Kërkojmë qeveri tranzitore që ta çojë vendin në zgjedhje të lira të pakapura nga krimi dhe oligarkia. Kërkojmë një Shqipëri të re, me kontratë të re me qytetarët e shtetit, pushteti nuk është në dorën e oligarkisë, por të qytetarit, ndaj ne sot kërkojmë një Shqipëri të re”.
