Një tjetër viktimë është regjistruar si pasojë e motit të keq që përfshiu jugun e vendit. Një peshkatar është gjetur i pajetë në det, pranë ishujve të Ksamilit.
Viktima është identifikuar si Mihal Zoi, 61 vjeç. Sipas të dhënave paraprake, dyshohet se ai ka humbur jetën si pasojë e mbytjes.
Gjatë operacionit të kërkimit, Policia ka gjetur edhe mjetin lundrues të 61-vjeçarit, i cili rezultoi i fundosur. Dyshimet paraprake janë se ngjarja mund të ketë ndodhur mbrëmjen e kaluar, në kohën kur zona u përfshi nga stuhi të forta dhe kushte të rënduara atmosferike.
Grupi hetimor po punon për zbardhjen e plotë të rrethanave të ngjarjes, ndërsa po verifikohet pista e një mbytjeje aksidentale për shkak të motit të keq.
Sipas burimeve, 61-vjeçari ishte i divorcuar dhe fëmijët e tij jetojnë në Greqi. Në Shqipëri ai nuk kishte familjarë të tjerë përveç një motre.
