Gjykata e Apelit të Juridiksionit të Posaçëm shtyu seancën për Erlis Dukën, i cili është pjesë e dosjes së vrasjes së ish-punonjësit të policisë Santiago Malko.
Shkak për shtyrjen u bë pretendimi i mbrojtjes se Duka nuk ishte njoftuar sipas kërkesave ligjore, pavarësisht se avokatët e tij ishin të pranishëm në sallën e gjyqit.
Trupa gjykuese vendosi shtyrjen e shqyrtimit të çështjes për të vijuar në një datë tjetër, ndërsa SPAK ka kundërshtuar vendimin e pafajësisë së Erlis Dukës dhe ka kërkuar rishikimin e çështjes.
Dosja lidhet me një nga ngjarjet më të bujshme kriminale të viteve të fundit, ekzekutimin e Santiago Malkos, i vrarë rreth shtatë vite më parë. Për këtë ngjarje, Gjykata e Posaçme kishte dhënë gjithsej 130 vite burg për pesë të pandehur.
Leonard Duka, i cilësuar nga prokuroria si porositës dhe organizator i vrasjes, u dënua me 30 vite burg, ndërsa vëllai i tij Erlis Duka u shpall i pafajshëm nga gjykata e shkallës së parë.
Për vrasjen e Malkos u dënuan gjithashtu Fatmir Hyseni, Aleksandër Maxhaku, Dritan Aga dhe Oltion Lona, me nga 25 vite burg secili.
Leonard Duka u arrestua në shkurt të vitit 2024 në Belgjikë dhe më pas u ekstradua në Shqipëri për t’u përballur me drejtësinë.
Ndërkohë, në procese të tjera gjyqësore janë dënuar edhe persona të tjerë të lidhur me këtë ngjarje. Blendi Teta u dënua përfundimisht me 25 vite burg, ndërsa Ilir Selmani mori 28 vite burg nga Apeli pas rishqyrtimit të çështjes nga Gjykata e Lartë.
Dosja e vrasjes së Santiago Malkos vijon të mbetet aktive për pjesën që lidhet me Erlis Dukën, ndërsa pritet vendimi i Apelit pas shqyrtimit të pretendimeve të SPAK dhe mbrojtjes.
