Partia Demokratike braktisi seancën e djeshme parlamentare, ndërsa ish-deputeti Ervin Salianji e kritikoi këtë lëvizje duke e cilësuar si shërbim të Sali Berishës ndaj Edi Ramës.
Kritika ndaj vendimit të Berishës kanë ardhur edhe nga radhët e deputetëve të PD, disa prej të cilëve janë shprehur kundër bojkotit të seancës parlamentare.
Jorida Tabaku u shpreh përmes një mesazhi në grupin e deputetëve të PD se mospjesëmarrja u heq ligjvënësve të vetmen platformë publike për debat, duke theksuar se kjo është provuar dhe “pasojat dihen”.
Bujar Leskaj është shprehur se ky vendim për të bojkotuar seancën është i gabuar, duke pyetur se cili është kuptimi i këtij mesazhi që opozita jep duke mos marrë pjesë në Parlament.
Ina Zhupa është shprehur kritike, duke nënvizuar ato që shprehu Leskaj, duke pyetur se çfarë të mire sjell kjo për opozitën.
