Irani ka reaguar ndaj deklaratave të presidentit amerikan Donald Trump lidhur me mundësinë e përfshirjes së Shteteve të Bashkuara në menaxhimin e Ngushticës së Hormuzit, një prej rrugëve më të rëndësishme detare për transportin e energjisë në botë.
Komanda e Forcave të Armatosura iraniane ka paralajmëruar Uashingtonin se çdo përpjekje për të ndërhyrë në kontrollin e kësaj zone do të përballet me kundërpërgjigje. Teherani ka paralajmëruar gjithashtu vendet që mund të ofrojnë mbështetje për SHBA-në.
Zëdhënësi i Komandës Qendrore “Qatam al-Anbiya”, Ebrahim Zolfaghari, deklaroi se Irani nuk do të pranojë ndërhyrje të huaja në administrimin e ngushticës dhe se çdo veprim që, sipas tij, cenon sigurinë kombëtare do të konsiderohet kërcënim.
Tensionet rreth Ngushticës së Hormuzit, një korridor kyç për tregtinë globale të naftës, vijojnë të mbeten të larta për shkak të përplasjeve politike dhe ushtarake mes Teheranit dhe Uashingtonit.
