Kryeministri Edi Rama ka reaguar sërish për protestat masive në vend, duke i lidhur ato me një fushatë të gjerë dezinformimi dhe ndërhyrje kibernetike.
Deklaratat e tij erdhën gjatë një debati me gazetaren e CNN, Eleni Giokos, në një intervistë ku u diskutuan zhvillimet dhe perceptimi publik për situatën në Shqipëri.
Sipas Ramës, një pjesë e narrativës që qarkullon në rrjet është e ndikuar nga manipulime online, përfshirë video të rreme dhe materiale të marra nga protesta në vende të tjera, të paraqitura si ngjarje në Shqipëri. Ai shtoi se në këtë proces janë përfshirë edhe rrjete që, sipas tij, lidhen me sulme kibernetike të vazhdueshme ndaj vendit.
Ai paralajmëroi se kjo, sipas tij, po ndikon në mënyrë të drejtpërdrejtë në funksionimin e demokracive moderne dhe në proceset politike në Europë. Në vijim, Rama kritikoi edhe mënyrën e funksionimit të informacionit në rrjetet sociale, duke theksuar se liria e shpërndarjes së informacionit, sipas tij, po keqpërdoret.
Rama:…është provokuar kryesisht sepse Kushner dhe Trump, hija pas tyre, mjaftojnë për të bërë që shumë njerëz nga vende dhe kontinente të ndryshme të reagojnë menjëherë.
Por sasia e dezinformatave, e videove të rreme, e videove të marra nga protesta në vende të tjera dhe të paraqitura si protesta në Shqipëri, sasia e bot-eve që kanë hyrë aty nga armiku ynë… Ne kemi një armik, i vetmi armik është Republika Islamike e Iranit, dhe ata kanë tre vjet që zhvillojnë një sulm kibernetik të pamëshirshëm kundër Shqipërisë dhe janë përfshirë edhe në këtë çështje.
Kjo sasi çmendurie po gërryen demokracitë tona nga brenda dhe po e çon hapësirën europiane në drejtime që, më shpejt sesa vonë, do të shkatërrojnë plotësisht ndjesinë e politikës, vendimmarrjes dhe kompromisit në këtë pjesë të botës. Prandaj është koha që demokracitë të mos besojnë më se ‘liria e shtrirjes së informacionit’ është një zgjatim i lirisë së shprehjes. Liria e shtrirjes së informacionit është ajo që çdo regjim, përmes propagandës, ka përdorur për të futur gënjeshtrën në çdo mendje.
