Nga Boldnews.al
Salvador (Shpëtim) Aliu është një 50-vjeçar nga Elbasani, tërësisht i panjohur për opinionin publik shqiptar dhe për autoritetet policore deri para pak ditësh. Megjithatë, një hetim i Prokurorisë së Posaçme, i bazuar në materialet e përcjella nga autoritetet ndërkombëtare, e vendos emrin e Aliut në një pozicion drejtues të një grupi kriminal që dyshohet se ka trafikuar tonelata kokaine nga Amerika Latine në drejtim të Europës.
Për momentin, nuk ka gjurmë që lënda narkotike të jetë dërguar edhe në Shqipëri. Por, në vendin tonë besohet se janë dërguar milionat e eurove, të cilat janë shndërruar në beton luksoz nga Tiranë, në bregdetin e Durrësit e deri në brigjet e Jonit, në perlën turistike të Dhërmiut.
Prokurorët e posaçëm identifikojnë një grup kompanish, të cilat dyshohet se kanë kryer pastrimin e parave të grupit kriminal. Në qendër të hetimit janë bizneset e lidhura me Isa Aliun, vëllain e Salvatorit, si edhe të familjarëve Nikoll, Shpëtim dhe Sokol Bibaj, si edhe të tjera kompani që kanë bashkëpunuar me to.
“Boldnews.al” raportoi më herët për sekuestrimin e 121 vilave në resortin “Porto Lalzi”, në Hamallaj të Durrësit, të lidhura me kompaninë “Aliu Road House” të Isa Aliut. Ndërkohë, lista e pasurive të sekuestruara është më e gjatë dhe përfshin një “album luksoz”.
Albumi luksoz
Kompanitë në pronësi të Isa Aliut, “Aliu Road House” dhe “Seaview Development” janë menaxhuese të një hoteli luksoz, të pozicionuar në bregun jugor të Dhërmiut.
“Zig-Zag Resort” është mbështetur mbi një projekt të studios së njohur arkitekturore JA Joubert Architecture, e cila e ka reklamuar fuqishëm në rrjetet e saj sociale, si një ndër punët e saj më të mira.
Struktura është parashikuar të jetë një një resort luksoz me 5 yje, me rreth 200 dhoma akomodimi. Edhe ky projekt është përfshirë në listën e pasurive të sekuestruara së fundmi.
Disko e njohur “Road House”
Pjesë e pasurive të vendosura nën sekuestro është edhe një lokal nate-disko e njohur në Elbasan, “Road House”.
Kjo pasuri është në pronësi të “Aliu Road House” të Isa Aliut dhe dyshohet nga Prokuroria e Posaçme se është produkt i pastrimit të parave, të prejardhura nga trafiku i kokainës së grupit të drejtuar nga Salvador Aliu, Eldi Dizdari e Dritan Gjika.
Rindërtuesi
Thuajse të njëjtën kohë, në vitin 2020, kompania “Aliu Road House”, e cila e kishte nisur aktivitetin tregtar në fushën e import-eksport të mallrave ushqimore e elektroshtëpiake, regjistron në listën e nënkontraktorëve në procesin e Rindërtimit, pas tërmetit të 26 nëntorit 2019, megjithëse deri në atë moment nuk kishte në objektin e saj punime ndërtimore.
Sipas të dhënave të publikuara nga vetë kompania në faqen e saj të internetit, “Aliu Road House” është përfshirë si nënkontraktor në disa projekte rindërtimi, përfshirë: (1) Spitallë, Durrës – Ndërtim dhe rindërtim në zonën e prekur; (2) Projekti i Spitalit Kombëtar – Zhvillimi i infrastrukturës në sektorin e kujdesit shëndetësor në Shqipëri. (3) Rindërtimet e Njësive Rezidenciale në Shijak (Zona e Zhvillimit të Ri, Paketa D): Objekti 5.15, Objekti 5.16; dhe Objekti 5.17.
Projekte në Qerret e Korçë
Referuar të dhënave të publikuara nga vetë kompania, “Aliu Road House” rezulton e përfshirë edhe në disa projekte të tjera, në zonën bregdetare në Qerret, si edhe në Selitë të Tiranës, pranë Kodrës së Diellit.
Në Qerret të Kavajës, shumë pranë bregut të Adriatikut, shoqëria në pronësi formale të Isa Aliut është angazhuar në ndërtimin e disa godinave 6-katëshe, në një hapësirë rezidenciale, e cila, sipas renderit, duke e mirëkuruar.
Gjithashtu, në Selitë të Tiranës, kompania “Aliu Road House” është angazhuar për ndërtimin e një godine rezidenciale.
Nga pamjet e godinës së përfunduar, ajo duket një ndërtesë masive, e përbërë nga rreth 4-5 objekte banimi të ngjitur me njëri-tjetrin.
Krahas këtyre projekteve, shoqëria “Aliu Road House” thotë se ka në zhvillim një hotel në Korçë. Godina ende nuk është ndërtuar, por nga pamjet e ofruara nga vetë shoqëria, duke një ndërtesë në formë harku dhe investimi duket luksoz.
Për momentin, nuk ka të dhëna nëse ka nisur ndërtimi i këtij hoteli dhe se në cilën fazë është zbatimi i projektit.
Leje për hotel në Jalë
Në vitin 2024, Isa Aliu, nëpërmjet kompanisë së tij “Aliu Road House”, krijon një kompani bijë, “Seavieë Development”. Me këtë subjekt të ri, Aliu aplikon pranë Këshillit Kombëtar të Territorit (KKT) për leje ndërtimi për një hotel në zonën bregdetare të Jalës, pranë Dhërmiut.
Në 24 Prill 2026, KKT, e drejtuar nga kryeministri Edi Rama, kishte në rend të ditës, ndër të tjera, edhe shqyrtimin e kërkesës për “ Leje Ndërtimi për objektin: “Hotel Iberostar, Resort me 5*, me 1, 2, 3 dhe 4 kate mbi tokë dhe me 1-5 kate nëntokë”, me vendndodhje në Jalë, Bashkia Himarë, me subjekt zhvillues shoqërinë “Seaview Development” sh.p.k.
Për momentin, në faqen zyrtare të Agjencisë së Zhvillimit të Territorit (AZHT), nuk është publikuar asnjë e dhënë, nëse aplikimi është pranuar apo refuzuar. Megjithatë, në faqen e institucionit janë publikuar shumë vendime refuzimi, të miratuara në atë mbledhje. Aplikimi i kompanisë së Isa Aliut nuk gjendet, të paktën deri më tani, në listën e projekteve të refuzuara.
Ndërkohë, Prokuroria e Posaçme thotë se ka vendosur nën sekuestro edhe “pasuritë e shoqërisë “Green Invest shpk”, e cila zotërohet me 50 përqind nga Isa Aliu”, si edhe “pasuritë e shoqërisë “Aliu Road House Security” shpk, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë”.
Nga një kërkim i “Boldnews.al”, rezulton se kompania “Green Invest”, me ortak Isa Aliu, ka aplikuar për leje ndërtimi në zonën e Zvërnecit, në Vlorë.
Këshilli Kombëtar i Territorit (KKT), nën drejtimin e kryeministrit Edi Rama, ka marrë në shqyrtim në 20 nëntor 2024 kërkesën për “Leje Zhvillimi për objektin: “Kompleks turistik me shtëpi pushimesh, shërbime dhe hotel”, me vendndodhje në Zvërnec, Bashkia Vlorë, me subjekt zhvillues shoqërinë “Green Investment” sh.p.k.”
Redaksia bëri një kërkim në lejet e zbardhura nga KKT, por nuk u konstatua leje e zbardhur për këtë aplikim dhe nuk ka asnjë të dhënë nëse është pranuar apo është refuzuar.
Pasuritë e familjes Bibaj
Nikoll dhe Sokol Bibaj janë dy nga pjesëtarët e grupit të dyshuar kriminal, të cilët Prokuroria e Posaçme i ka shpallur së fundmi në kërkim.
Hetimi ka zbuluar se kompani të lidhura me këta dy individë janë “Altea Construction” dhe “Altea Invest”, në pronësi të Shpëtim Bibaj. SPAK-u thotë se “janë vënë nën sekuestro pasuritë e këtyre dy subjekteve, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë”.
Kompania “Altea Invest” rezulton se ka përfituar një leje ndërtimi për hotel në Dhërmi, me firmën e kryeministrit Edi Rama.
Këshilli Kombëtar i Territorit, me vendimin nr.29, datë 17 mars 2021, ka miratuar “Leje ndërtimi për strukturë hoteliere me 1, 2 ,3, 4 dhe katër kate nëntokë, në Dhërmi, bashkia Himarë”, me zhvillues “Altea Invest”. Kompania është krijuar nga Nikoll Bibaj në vitin 2020 dhe më pas aty është shtuar si ortak edhe Shpëtim Bibaj.
Familja Bibaj zotëron gjithashtu edhe një hotel luksoz në Tiranë, “Elisa”, e lidhur me brandin e njohur “Melia”.
Edhe ky hotel është vendosur nën sekuestro, në kuadër të hetimeve për grupin kriminal që dyshohet se ka trafikuar tonelata kokainë dhe ka krijuar një skemë masive pastrim parash në Shqipëri.
“Është vendosur nën sekuestro objekti “Hotel Elisa Tirana”, afilated by Melia “Strukturë Hoteleri 2, 4, 5, 8 dhe 10 kat ne 3 kat nëntokë në adresë në rrugën e Dibrës” Tiranë”, thuhet në njoftimin zyrtar të Prokurorisë së Posaçme.
Familja Bibaj, nëpërmjet kompanisë “Altea Construction” zotëron edhe shoqërinë e ndërtimit “S.T.N.P.M sha”.
Të dhënat nga burimet e hapura tregojnë se ky subjekt ka siguruar, më së paku, leje ndërtimi për “Godinë banimi dhe shërbime me 2, 5, 7 dhe 9 kat parkim nëntoke, në rrugë ‘Ali Visha’, në Tiranë.
Prokuroria e Posaçme thotë se ka vendosur nën sekuestro “kuotat e shoqërisë “S.T.N.P.M sha”, me seli qendrore në Tiranë, në masën 50 % , të cilat i përkasin ortakut Shpëtim Bibaj, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë në masën 50 %”
Ndërkohë, familja Bibaj zotëron edhe një kompani, “F&XH Cons, e përfshirë në aktivitete turistike. Edhe për këtë kompani, SPAK-u thotë se ka vendosur nën sekuestro “pasuritë e shoqërisë “F$Xh invest shpk” sh.p.k, me seli në Tiranë, duke përfshirë çdo pasuri të luajtshme dhe të paluajtshme, asete, të drejta ndaj të tretëve, pjesë të kapitalit, si dhe kuotat e shoqërisë”.
Sekuestro e pasurive të tjera
Krahas pasurive më lart, Prokuroria e Posaçme thotë se ka vendosur nën sekuestro edhe një numër të konsiderueshëm vilash e godinash, për të cilat dyshon se janë pasuri të grupit kriminal, të krijuara nëpërmjet fitimeve të paligjshme nga trafiku i drogës.
Në njoftimin zyrtar, SPAK rendit këto pasuri, për të cilat nuk lejohet tjetërsimi.
Sipas prokurorisë, janë vendosur nën sekuestro “vila në kompleksin Altrea Rezidence, Tiranë; Vile ne Diamond Hill; Vila dhe njësi shërbimi në “Braca rezidence Diamond Hill”, në Durrës”;
Po ashtu, Prokuroria e Posaçme njpfton se janë vendosur nën sekuestro, si pasuri të dyshuara se janë krijuar nga trafiku i kokainës edhe “ndërtesa në kompleksi rezidencial vilash në zonën e Mjull Bathores Tiranë, në “Astoria Residence; 32 apartament, 6 njësi tregtare /zyra dhe 52 parkime tek Godina e banimit dhe shërbime me 1,8, 9 dhe 34 kate mbi tokë dhe 4 kate nëntokë me vendndodhje në rr. Xhanfize Keko, Tiranë; 2 objekte banimi 2 dhe 3 kate me 2 dhe 3 kate nëntokë (banim dhe parkim) me mur rrethues, rr. “Herman Gmainer”; si edhe disa pasuri të paluajtëshme në Godinë banimi dhe shërbime 2,5,7 dhe 9 kate me 2 kat parkim nëntokë” Rr. Ali Visha Njësia 2, Tiranë”.
LEXO EDHE:
