Drejtoresha e Operatorit të Blerjeve të Përqendruara (OBP), Arlinda Pogaj, ka njoftuar zyrtarisht largimin nga drejtimi i këtij institucioni.
Përmes një reagimi publik, Pogaj e cilësoi këtë eksperiencë si një përgjegjësi dhe privilegj të veçantë, ndërsa theksoi rolin e saj në ngritjen dhe konsolidimin e institucionit, i cili sipas saj ka fituar besimin e institucioneve kryesore publike në vend.
Ndërsa në deklaratën e saj zyrtare Arlinda Pogaj u fokusua te shifrat e kursimeve dhe arritjet e institucionit, raportimet në media dhe hulumtimet e ndryshme gazetareske kanë ngritur shpesh pikëpyetje të mëdha mbi mënyrën se si Operatori i Blerjeve të Përqendruara ka menaxhuar tenderat ndër vite.
Në rolin e saj si drejtoreshë e Operatorit të Blerjeve të Përqendruara, ajo akuzohet se ka manipuluar procedurat e prokurimeve duke përshtatur kriteret për të favorizuar kompani të caktuara.
Një rast i përfolur është tenderi për automjetet e Policisë së Shtetit, ku dyshohet se fituesi ishte paracaktuar.
Gjithashtu, bashkëshorti i saj, Edigen Pogaj, është përmendur si sekser në këto skema, duke negociuar përqindje ryshfeti në këmbim të fitimit të tenderëve.
Kriteret teknike janë detajet ku fshihet “djalli” sa herë dikush ka vendosur paraprakisht për t’ia dhënë tenderin “dikujt”, qoftë ky edhe deputet i PS.
Duket se rrethanat e zhvillimit të tenderit me objekt “Blerje kite reagent dhe materiale mjekësore për analizat e matësit në gjak astrupograma”, me fond limit 83,904,000 lekë, i organizuar nga Operatori i Blerjeve të Përqendruara, janë duke lundruar pikërisht në këto ujëra.
Siç duket edhe nga dokumentet, për këtë procedurë kanë treguar interes pesë kompani, ndërkohë që kanë paraqitur ofertë katër prej tyre.
Megjithatë, Operatori i Blerjeve të Përqendruara ka shpallur fituese kompaninë me ofertën më të shtrenjtë, pikërisht atë pas së cilës fshihet deputeti i PS, Vasil Llajo, duke u bazuar në kriteret teknike, të cilat shpesh përdoren si një llastik që zgjatet ose tërhiqet sipas tekave të drejtuesve që menaxhojnë tenderët.
Më konkretisht, në garë kanë qenë operatorë si KRIJON, MEDFAU, EVITA dhe SWISSMED.
Nga të dhënat rezulton se kompania SWISSMED ka paraqitur ofertën më të lartë prej 71,484,000 lekësh, ndërkohë që ofertuesi i dytë më i lirë, MEDFAU, ka ofertuar 63,480,000 lekë.
Diferenca mes tyre arrin në rreth 90 mijë euro. Por, problemi nuk qendron të paratë, madje këtu nis.
Për të gjithë ofertuesit e tjerë, OBP ka gjetur nga një “kleçkë” në kriteret teknike për t’i skualifikuar një nga një, deri në momentin që radha ka shkuar te SWISSMED, e cila ka përfituar gjatë viteve të fundit rreth 22 milionë euro pagesa nga buxheti i shtetit, një fakt që ngre pikëpyetje mbi këtë përzgjedhje.
SWISSMED është në letra në emër të një zonje të quajtur Argita Bojaxhiu, por sipas të dhënave të siguruara, pas saj qëndron deputeti i PS, Vasil Llajo, i cili i ka transferuar aksionet në letër te zonja pak ditë para marrjes së mandatit.
Llajo është pronar faktik edhe i Intermedica.
Nga dokumentet që ka konsultaur skyweb.al, rezulton se kontrata e shitjes së kuotave të Swissmed nga Llajo dhe zonja Bojaxhiu nuk parashikon pagesë të menjëhershme, por me këste, çka nënkupton se blerësja do të shlyejë vlerën përmes fitimeve të vetë kompanisë në vijim (shih dokumentin).
Eshtë njëlloj sikur të blesh një apartament pa kokërr leku dhe pronari të të lejojë që pagesën t’ia bësh nga qiraja që do të marrësh ndër vite.
Ky fakt shihet si një element që shpjegon edhe mënyrën se si dhe pse janë skualifikuar të gjitha ofertat e tjera, duke i hapur rrugë kompanisë në fjalë.
Ky fakt duket se është konstatuar edhe nga vetë kompanitë pjesëmarrëse në tender.
Dy prej tyre, MEDFAU dhe EVITA, i janë drejtuar Komisionit të Prokurimit Publik duke kërkuar shfuqizimin e vendimit dhe rikthimin e procedurës në kushte ligjshmërie.
Madje, sipas të dhënave, situata është konsideruar aq problematike sa drejtuesja Arlinda Pogaj ka hezituar të firmosë vendimin përfundimtar për shpalljen e fituesit.
Të dyja kërkesat janë tashmë të regjistruara në KPP dhe pritet të shqyrtohen, ndërkohë që rasti në fjalë po shihet si një precedent që mund të përfundojë në SPAK, për mënyrën se si një procedurë publike mund të orientohet drejt një rezultati të paracaktuar.
Në disa dosje të publikuara, Pogaj lidhet edhe me figura të krimit të organizuar, si Gentian Sharra dhe Elgert Laskaj, të cilët kanë përfituar kontrata me vlera të mëdha përmes ndërhyrjeve të paligjshme.
LEXO EDHE:
Arlinda Pogaj i jep tendera burrit të saj Edigen Pogaj, skema korruptive 5D në OBP që sfidon SPAK-un
Tender 1 mln euro/ E quan “Fake news”, por Arlinda Pogaj konfirmon të dhënat e “Boldnews.al”
Dosja penale dhe lidhjet kriminale/ Ortaku i Gentian Sharrës aferë 10 mln € me Arlinda Pogajn e OBP
