Nga Boldnews.al
Ministrja virtuale e Ramës, e dekretuar edhe nga presidenti, e njohur si “Diella”, një avatar shpjegues në duart e AKSHI-t famëkeq, prej kohësh nuk është shfaqur më, por për kryeministrin ka një arsye. “Mund të jetë krijuar një opinion sikur Diella po fle. Por, tani jemi në një fazë të re të procesit, pasi gjatë kësaj periudhe janë hartuar 450 faqe me specifikime teknike të detajuara, për të cilat kanë punuar ekspertë vendas”, tha Rama. Bëhet fjalë për procesin e “tenderave digjitalë” që Rama thotë se është teknologji e avancuar dhe që do të shmangë korrupsionin.
Po kush janë njerëzit që kurdisin Diellën dhe i fusin duart ku e si të duan? Në një platformë digjitale, “ekspertët vendas” që i quan Rama, nuk janë gjë tjetër pëveç disa nëpunës të kësaj administrate që hedhin të dhëna për kompani të ndryshme, duke u nisur nga referencat e tyre, por edhe për “eksperiencën” (punët publike që kanë kryer në Shqipëri).
Afërmendsh që çdo kompjuter i furnizuar me “dokumentet e Rilindjes”, do të nxjerrin automatikisht fitues “kompanitë me eksperiencë”. Do të jenë pikërisht këto kompani që nuk kanë lënë PPP pa kapur. Do jenë të njëjtët që bëjnë aleshverishe të frikshme me paranë publike. Ndryshimi është se “vlerësuesit e tenderave” janë ekspertët e pushtetit që i rrasin Diellës të dhënat që u sugjeron shefi i madh.
Kjo lloj forme për të fshehur batërdinë me tendera pritet t’i hapë teleshe Diellës së “pagjumë”, por mbahet me faktin se ajo nuk mund të thirret në SPAK (fizikisht), pasi nuk ekziston, por virtualisht mund të merret e pandehur për çdo aferë që mbulohet nën kopertuerën e “kompjuterit të pagabueshëm”.
Zyrtarisht Rama ushtron edhe funskionin e “ministres Diella”. Në dekretin presidencial ngritja dhe funksionimi këtij posti ministror i ngarkohet kreut të qeverisë. Diella nuk po fle. Në vijim do shihen çudira.
