Aulon Kalaja ka bërë deklarata të forta në lidhje me çështjen Balluku, duke pretenduar se denoncimi ndaj saj nuk ka ardhur nga opozita, por nga vetë përfaqësues të Partisë Socialiste.
Sipas Kalasë, dosjet për Belinda Ballukun janë dërguar në Gjermani nga vetë deputetë socialistë dhe jo nga opozita, ashtu siç është pretenduar.
Nga ana tjetër, ai ka ngritur dyshime për një balancë të brendshme pushteti mes Edi Ramës dhe Ballukut, të cilët sipas Kalasë, funksionojnë si dy enë komunikuese.
Sipas tij, Balluku zotëron një ndikim të konsiderueshëm në pushtet, duke rinegociuar një marrëveshje me Ramën për të futur në qeveri njerëz të saj.
Ai shprehu gjithashtu kritika ndaj SPAK, duke vënë në pikëpyetje mungesën e veprimeve konkrete, pavarësisht pretendimeve për ekzistencën e materialeve komprometuese që lidhen me Ballukun dhe zyrtarë të tjerë të qeverisë.
“Kontrolli parlamentar është një e drejtë e pakicës, të paktën në Republikat e Europës perëndimore, ndërkohë në Shqipëri ndodh e kundërta. Janë këta që përcaktojnë debatin në parlament, kush duhet të përjashtohet nga parlamenti, çfarë komisioni hetimor duhet të jepet e të tjerë e të tjerë. Kështu nuk shikoj ndonjë gjë të re, domethënë. Opozita sigurisht që do duhet të ndryshojë strategjinë në raport që mos të godasë më me kontroll parlamentar, por të jetë në shesh. Atë që po bën faktikisht, me protestën e radhës apo me protesta të tjera.
Unë mendoj që këtu bëhet një gabim, në raport me korrupsionin. Nuk kemi të bëjmë me korrupsion për mendimin tim. Kemi të bëjmë me krim të organizuar ekonomik. Korrupsioni është term komunar, domethënë ka, ka përparuar situata me qeverinë Rama. Përsa i përket SPAK-ut, unë habitem me të thënë të drejtën, me mënyrën se si po vepron deri tani, ku dihet botërisht që aty ka video për, jo vetëm për zonjën Balluku. Drejtorë të rëndësishëm të qeverisë Rama, shumë të rëndësishëm, kombëtar, kanë afera seksuale dhe video pikërisht në këtë dosje, që SPAK-u i ka dhe unë habitem tani se si ka mundësi që nuk po vepron. Pra nuk bëhet fjalë thjesht për video që kanë këtë konotacionin erotik. Këtu bëhet fjalë për video që ngërthejnë vetvete interesat e pushtetit, duke e përdorur si mjet shantazhi nga ana tjetër këtë lloj video në raport me mënyrën se si do të shkojë krimi i organizuar ekonomik.
Për mendimin tim Rama dhe Balluku janë si dy enë komunikuese dhe korrupsioni kalon njëherë këtej njëherë andej. Pra kemi një zonjë e cila në gjykimin tim është më e fortë se kurrë tani sepse ka rinegociuar një marrëveshje me Ramën, ka marrë ministritë që kishte, ka një grup parlamentar prej 12 deputetësh për hir të së vërtetës. Që e ka vetin. Sepse, kini parasysh diçka, janë 83 deputetë, në rast se lëviz zonja, ka lëvizje tektonike në Partinë Socialiste. Kemi parasysh që kemi dhe zonjën Spiropali, pra nga 83, 12 i ka kjo, shko 71. Zonja Spiropali, zoti Braçe, zoti Fatmir Xhafaj, një grup i presupozuar i Erion Velisë, jam shumë dyshues por thonë që ka një grup të tillë, dhe unë mendoj që situatat janë shumë interesante. Ajo që më habit mua është nga SPAK-u për hir të së vërtetës, se si ka mundësi që nuk po vepron.
Kemi për herë të parë në historinë e diplomacisë një shtet si Gjermania, që është e konfirmuar që dosjet nuk ja ka çuar opozita, dhe këtë e them me përgjegjësi të plotë, ja kanë çuar deputetët e Partisë Socialiste, dosjen e Belinda Ballukut. Nga vetë socialistët. Po, e kanë çuar ata dhe kemi parasysh që faktet janë aty dhe për herë të parë Gjermania flet me emër. Zoti McAllister i cili është një njohës shumë i mirë i Shqipërisë, erdhi përmes gjithë krizën e 17-ës te Çadra e Lirisë, tha që gur themeli për ecjen e Shqipërisë drejt Bashkimit Europian, për ta prekur temën e parë të juajën, është zonja Belinda Balluku. Pra foli me emër, nuk kanë folur kurrë këta me emër. Është hera e parë. Atëherë çfarë po ndodh? Në gjykimin tim, që ta mbyll domethënë këtë situatë të parë, është situata e tillë që zoti Rama ka një marrëveshje të re me Belinda Ballukun, mbrojtja e zonjës Belinda Balluku deklaroi sot që nuk ka një rrezik potencial për arratisjen e zonjës Balluku. Me këtë argumentojnë nevojën… Për mua kjo është e vërtetë, për momentin gjithmonë, sepse ka marrëveshje midis Ramës dhe Ballukut. Në rast se nuk do të ketë marrëveshje dhe prishet marrëveshja, absolutisht Belinda Balluku arratiset dhe shteti që do iki, unë e kam bindje absolute, do të iki në Greqi. Sepse atje janë edhe dosjet e shërbimeve që ka dërguar kjo zonjë. Ajo quhet ndryshe Bela Mafia”,- ka deklaruar Kalaja në Syri TV.
