Një 50-vjeçar me origjinë shqiptare është arrestuar nga policia italiane si autor i dyshuar i një tentative grabitjeje me armë zjarri në një argjendari në qendër të qytetit të Bolonjës.
Ngjarja ndodhi mëngjesin e 31 marsit në rrugën “Via degli Artieri”, ku i dyshuari tentoi të grabiste dyqanin duke përdorur një pistoletë. Ai u identifikua dhe u ndalua vetëm pak orë më vonë nga efektivët e policisë në zonën Pilastro, falë pamjeve të kamerave të sigurisë dhe dëshmisë së pronarit të argjendarisë.
Sipas autoriteteve, 50-vjeçari është një person i njohur për forcat e rendit, me një histori të gjatë kriminale që përfshin trafik droge dhe një dënim për tentativë vrasjeje në vitin 2013, kur qëlloi me armë zjarri brenda një salle bastesh pranë Piazza Mickiewicz.
Gjatë kontrollit në banesën e tij, policia gjeti sende që përputhen me ato të përdorura gjatë grabitjes, si syze, çantë shpine, këpucë dhe xhaketë. Gjithashtu u sekuestrua një fishek i kalibrit 22, i ngjashëm me armën e përdorur në ngjarje, ndërsa pistoleta ende nuk është gjetur.
Për shkak të provave dhe rrezikut të lartë të arratisjes, pasi i dyshuari nuk kishte lidhje familjare apo punë të qëndrueshme, ndaj tij u vendos masa e ndalimit dhe aktualisht ndodhet në burg në pritje të vendimit të autoriteteve gjyqësore.
Autoritetet theksojnë se bëhet fjalë për një person me rrezikshmëri të lartë, i njohur për sjellje të dhunshme dhe përfshirje në aktivitet kriminal ndër vite.
