Kryedemokrati, Sali Berisha, ka deklaruar nga Brukseli se protesta e 22 marsit do të ketë, sipas tij, jehonë përtej kufijve të Shqipërisë.
Nga samiti i Partisë Popullore Europiane (PPE), Berisha bëri të ditur se ka paraqitur në mënyrë të përmbledhur situatën dhe zhvillimet në Shqipëri, duke sjellë në vëmendje çështje që lidhen me realitetin politik dhe ekonomik në vend.
Ai më tej ka bërë thirrje qytetarëve shqiptarë të marrin pjesë në protestën kombëtare, e cila do të mbahet ditën e diel, më 22 marsm zëri i së cilës sipas tij do të ushtojë Europën.
“Mora pjesë në punimet e samitit të Partisë Popullore, në të cilin ishin të pranishëm kryetarët e shteteve, kryetarët e qeverive dhe kryetarët e partive opozitare të të gjitha vendeve anëtare të BE dhe vendeve në proces integrimi, në të cilën një ndër to është PD si një parti e asociuar në Partinë Popullore Europiane. Samiti u përkushtua temave më të mprehta aktuale. U diskutua çështja e energjisë dhe krizës së krijuar nga lufta në Lindjen e Mesme, goditjet që Irani u ka bërë të gjitha instalimeve të naftës dhe gazit në vendet e Gjirit Persik. U përqendrua në problemin madhor të Ukrainës dhe u shpreh mbështetje e plotë, solidaritet i plotë me Ukrainën, mirënjohje ndaj saj për qëndresën ndaj agresionit rus.
Çështje tjetër që u diskutua në këtë samit ishte konkurrueshmëria në hapësirën e BE. Samiti i PPE ka për qëllim bashkërendimin e qeverive të qendrës së djathtë në kuadrin e samitit evropian që mbahet pas tij.
Natyrisht, sytë, mendjet e miqve tanë, partnerëve tanë në Evropë dhe në botë janë të drejtuar edhe tek qytetarët shqiptarë, tek opozita shqiptare, qëndresa e tyre ndaj këtij regjimi, përpjekja e tyre për largimin e tyre.
Nga Brukseli shfrytëzova rastin, nga ai moment historik siç ishte kremtimi i 50-vjetorit të PPE dhe samiti i liderëve kryesorë, kancelari Merz, Ursula von der Leyen, Presidentja e Komisionit Evropian dhe liderë të tjerë të pranishëm, pra shfrytëzova këtë rast për t’u bërë thirrje shqiptarëve që më 22 mars, në kryengritjen tonë paqësorë, të ngremë zërin fuqishëm. Të ushtojë në Shqipëri, në Evropë dhe në botë zëri i protestës, zëri i kryengritësve paqësorë shqiptarë”, është shprehur Berisha.
