Një shtetas shqiptar i shpallur në kërkim ndërkombëtar nga autoritetet italiane është arrestuar në Greqi, me qëllim ekstradimin drejt Italisë, ku është dënuar për trafik droge.
Sipas autoriteteve greke, 44-vjeçari u vu në pranga një ditë më parë, në zbatim të një urdhër-arresti evropian të lëshuar nga Prokuroria Publike e Peruxhias. Ai ishte në kërkim që prej marsit të vitit 2024.
Shqiptari rezulton i dënuar për përfshirje në një organizatë kriminale që vepronte kryesisht në rajonin e Abruzzos, në zonën e Pescarës, e përbërë nga 34 shtetas italianë dhe shqiptarë, të angazhuar në trafikimin e lëndëve narkotike.
Sipas hetimeve, aktiviteti i tij kriminal ishte dokumentuar që në vitin 2007, në zonat Montesilvano dhe Popoli, ku gjatë operacioneve policore iu gjetën rreth 4.5 kilogramë heroinë dhe 0.5 kilogramë kokainë, të destinuara për shpërndarje në tregun e paligjshëm.
Provat e siguruara nga autoritetet çuan në një dënim përfundimtar prej 4 vitesh e 1 muaji burg. Ndërkohë, ai kishte vuajtur një pjesë të dënimit në Spanjë, në burgun e Valencias, përpara se të zhdukej.
Falë bashkëpunimit ndërkombëtar policor dhe hetimeve të koordinuara, fillimisht u lokalizua në Spanjë dhe më pas në Greqi, ku u arrestua në Aeroportin e Evzonit.
44-vjeçari pritet të ekstradohet drejt Italisë për të vuajtur pjesën e mbetur të dënimit prej 3 vitesh e 11 muajsh burg, ndërsa procedurat për ekstradimin janë në vijim.
