Deputeti demokrat, Klevis Balliu, ka reaguar lidhur me votimin për Ballukun, ku PS rrëzoi kërkesën për heqjen e imunitetit dhe arrestimin e saj .
Në një reagim në rrjete sociale, Balliu deklaron se vendimi sipas tij është “pasqyra më e pastër e pushtetit të Ramës”, ndërsa akuzon qeverinë se prej kohësh ka një mision të vetëm “të zhvatë qytetarët shqiptarë dhe të mbrojë interesat e pushtetarëve.
Sipas tij, pushteti po përdoret si mburojë politike për të legjitimuar dhe mbrojtur abuzimet.
“Vendimi i Ramës sot është pasqyra më e pastër e pushtetit të tij. Prej kohësh kemi denoncuar se kjo qeveri ka një mision të vetëm: të zhvatë qytetarët shqiptarë dhe të mbushë xhepat e pushtetarëve. Prej kohësh kemi theksuar se ky pushtet përdoret si mburojë politike për të mbrojtur dhe legjitimuar abuzimet e veta.
Sot, përmes një vendimi të paprecedentë, një parti politike ndërhyri për të penguar drejtësinë të ushtrojë funksionin e saj kushtetues. Ky veprim ekspozon qartë fytyrën reale të këtij pushteti: burg për qytetarët e zakonshëm dhe amnisti për Ramën dhe për ata që kanë abuzuar me besimin publik, – shkruan Balliu ndër të tjera në fb.
