Avokati i ish-presidentit Ilir Meta, Kujtim Cakrani, është dhunuar mesditën e kësaj të diele në qytetin e Vlorës, në ambientet e një pike karburanti në rrugën Tranballkanike.
Ngjarja ka ndodhur rreth orës 13:30 dhe ka përfshirë një konflikt mes tij dhe dy personave.
Sipas deklarimeve të vetë Cakranit, ai ka pohuar se dy persona e kanë sulmuar dhe se njëri prej tyre e ka goditur me mjet prerës pas koke.
Policia e Vlorës ka reaguar zyrtarisht lidhur me ngjarjen, duke bërë me dije se avokati, 55 vjeç, është përfshirë në konflikt në momentin që po furnizonte automjetin me karburant.
Paraprakisht dyshohet se përplasja ka ardhur si pasojë e pozicionimit të automjetit në pikën e karburantit dhe bllokimit të mjeteve të tjera.
Si pasojë e dhunës, Kujtim Cakrani ka mbetur i lënduar dhe aktualisht po merr ndihmë mjekësore në spital, ndërsa gjendja e tij shëndetësore nuk raportohet të jetë e rëndë.
Nga veprimet e para hetimore, policia njofton se është bërë e mundur identifikimi i automjetit me të cilin janë larguar dy autorët nga vendngjarja.
