Komisioni për Reformën Territoriale, është bërë shkak debati këtë të martë në seancën plenare në Kuvend.
Deputetja demokrate, Ina Zhupa, kërkoi nga mazhoranca të hiqej nga rendi i ditës projekt vendimi i cili propozon ndryshime në përbërjen e këtij komisioni, me argumentin se nuk është votuar as pro as kundër në Konferencën e Kryetarëve.
Zhupa kërkoi nga socialistët të mos veprojnë në mënyrë të njëanshme për ta dështuar reformën, sikurse ka ndodhur në vitin 2014.
“Nuk është votuar në Konferencën e Kryetarëve dhe diçka e pavotuar në Konferencën e Kryetarëve nuk mund të futet në votim në seancë. PD ka qenë gjithmonë e gatshme për t’i qëndruar vendimit të votuar në Kuvend nga të dyja forcat për ta bërë reformën territoriale. E bëtë njëherë territorialen në 2014 dhe ka qenë e dëshmuar. Tërhiqeni atë projekt-vendim që keni futur sot pa rregull dhe rregullore dhe janë dy bashkëkryetarët që duhet të bashkërendojnë për mbledhjet, nuk mundet që PS t’i imponohet PD-së. Prandaj janë dy bashkëkryetarë. Mos veproni në mënyrë të njëanshme për të dështuar Reformën Territoriale siç e dështuar në vitin 2014!”, tha Zhupa.
Kujtomë se mazhoranca socialiste, deklaroi një ditë më parë në Komisionin e Posaçëm për Reformën Territoriale, se do ti drejtohej Kuvendit për ndryshim të përbërjes së komisionit, pas bojkotit të opozitës.
Ata deklaruan se nuk do të presin pafundësisht opozitën, pasi kjo e fundit vazhdimisht mungon në mbledhje, kështu që propozuan ndryshime në përbërjen e këtij komisoni.
Sipas kërkesës, PS kërkoi të marrë shumicën e anëtarëve të komisionit, si edhe drejtimin. PS kërkon po ashtu që të shtohet një anëtar më shumë nga radhët e socialistëve.
Gjithashtu, socialistët thonë se nuk duhet të ketë më bashkëdrejtim, por drejtuesi të jetë Arbian Mazniku ndërsa Luçiano Boçi të jetë nënkryetar dhe jo më bashkëkryetar.
Ndërkohë nga ana tjetër, demokratët kanë deklaruar se ata nuk e kanë bojkotuar mbledhjen. Sipas tyre datat që ishin përcaktuar për zhvillimin e Komisionit, anëtarët tanë nuk kanë qenë të pranishëm për shkak të angazhimeve të tjera të mëparshme.
