Nga Boldnews.al
Prej gati një muaji rresht, kryetari i Partisë “Shqipëria Bëhet”, Adriatik Lapaj, nuk mundi të bënte as 200 veta në shkallët para kryeministrisë, në një protestë që është për tu vlerësuar më shumë për qëndresën personale. Në ditën e 28, kur protesta nuk kishtë asgjë të dhunshme, forca të shumta policore, që i kalonin trefishin numrin e protestuesve, mësynë vrullshëm duke shkulur ç’të gjenin para.
Një detaj që pak ra në sy ishte përdorimi i “Forcës Operacionale” për të rrëmbyer me forcë katër protestues, një prej të cilëve i mitur. Çfarë kërkojnë forcat speciale në një protestë paqësore?
Forcat Speciale të Policisë së Shtetit vihen në aksion vetem me urdhër të Drejtorit të Përgjithshëm të Policisë së Shtetit, në rastet kur personat paraqesin rrezikshmërisë të lartë shoqërore, janë pjesë e organizatave kriminale, kanë kryer pengmarrje, ose ku ka të dhëna për akte terroriste. Asnjë nga këta elementë nuk ishte aty në shesh, ku “terroristi” më i madh mund të ishte duke ngrohur duart pranë bombulave të gazit.
Rama mendon se tregoi trimëri teksa ngriti në “ajër” Lapajn dhe mbështetësit e tij, për të zgërlaqur në trotuar disa protestues, me shpresën se nuk do të dalin më. Nga ana tjetër, po na tregon karakterin e fshehur që e ka çdo diktator, apo diktator në tentativë: vetëmburren se janë të fortë dhe përdorin forcën shtetërore (në këtë rast policisë) për të shuar çdo zë kundër tij.
Por, për Ramën, padyshim edhe për kryepolicin që nuk po kupton se në një kohë tjetër mund të përballet me akuza për shkelje të rënda të ligjit për Policinë e Shtetit, rëndësi ka që të mbajnë pushtet, me çdo mjet, sidomos dhunën. Sa më të mëdha të bëhen protestat, aq më shumë do shtohet zelli për raprezalje nga strukturat e rendit, në dejet e të cilëve vlon gjaku Rilindas.
Arsyet duhen parë jo tek drejtuesit policorë të emëruar nga Gysi i Ramës, por nga vetë Rama. Në këto momente ndodhet para tri trysnish; së pari duhet të japë një përgjigje mbi kërkesën e Prokurorisë Speciale për dhënien e autorizimit mbi arrestimin e mundshëm të zëvendëses së tij Belinda Balluku, së dyti, është afera e AKSHI-t, ku dyshimi nuk është më në oborrin qeveritar, por bash e në pragun e oborrit personal dhe e treta, që i jep përgjigje edhe dy “meraqeve” të para, është ftohja e dukshme e SHBA-ve me qeverinë Rama dhe personalisht me të.
Shenjat i ka dhënë se nuk do të tolerojë asnjë protestë. Paçka se është aq i lexuar për të kuptuar se fati i çdo kreu qeverie që shtyp dhunshëm protestat qytetare ka fundin më tragjik të mundshëm, sërish ai nuk do të bëjë hapa pas. Deklaratat e para kur mori drejtimin e qeverisë në vitin 2013 se do ketë devizën: “qëllimi im është për të bërë shtet dhe jo për të mbajtur pushtet”, tashmë nuk ekziston as si mirazh. Në momentet që po i brehen këmbët e karriges kryeministrore nga “minjtë e tij”, po përdor mjetin e fundit, dhunën me çizmen policore. Deri tani po vetëmburret si trim duke treguar dhëmbët shtrirë dhe ende nuk po bëhet bishë e tërbuar, por rreziku për të sulmuar kudo e me çdo formë për të mbajtur karrigen e brejtur është i madh. Të jetë trim?
