Ervin Salianji, nuk ka marrë pjesë sot në mbledhjen e Këshillit Kombëtar të PD-së, të thirrur nga Sali Berisha pasditen e kësaj të mërkure në selinë blu.
Ai ka sqaruar se nuk ishte prezent në mbledhje pasi sipas tij vëmendja duhet të shkojë te skandalet Rama-Balluku dhe jo te takimet e organizuara nga ai, të cilat janë kritikuar nga Sali Berisha.
“Sot nuk mora pjesë në mbledhjen e Këshillit Kombëtar që mos t’iu jap mundësi të shmangin vëmendjen nga skandali Rama-Balluku dhe skandali i AKSH-it”, është shprehur Salianji, ndërsa i është përgjigjur edhe akuzave të bëra për takimin në Elbasan.
Berisha deklaroi ditën e sotme se takimet e Salianjit në Elbasan janë të organizuara nga krimi, ndërsa akuzoi ish-deputetin se ka bashkëpunuar me bandën e Suel Çelës.
Në përgjigje, Saliani ka hedhur poshtë akuzat e Berishës, teksa i ka cilësuar si dëshmi të mjerimit politik.
“Në Elbasan ishte e gjithë struktura vitale e Partisë Demokratike. Akuzat imagjinare, siç ndodh rëndom me armiqtë imagjinarë të qëmotit, se unë paskam takuar ata që i kam denoncuar prej vitesh, duke filluar nga Suel Çela, janë një dëshmi e mjerimit politik. Veçanërisht kur dihet se shumëkush tjetër e ka pasur në krah dhe e ka përdorur për interesa të veta.
Por ç’rëndësi ka kjo. Në kushte të një demokracie dhe jo autokracie do shkoja në gjykatë të përballja çdo shpifës. Por në kushtet e një përballje për shkak se dua që Partia Demokratike të jetë fituese dhe disa rrogëtarë kanë frikën e humbjes së pushtetit e të pazareve po reagoj publikisht një herë, e më pas siç kam bërë çdo herë, do shkoj në vendngjarjet e krimit, korrupsionit dhe bashkëpunëtorëve të tyre në pazare!”,– ka thënë Salianji ndër të tjera në një reagim në rrjete sociale.
LEXO EDHE:
Berisha: Salianji organizoi takim me Suel Çelën, bashkëpunimi me krimin përbën “vijën e kuqe”
