Në një seancë të shkurtër në Kolegjin e Posaçëm të Apelimit, të martën, drejtuesi i SPAK, Klodian Braho, kërkoi në KPA lënien në fuqi të vendimit të KPK-së për të konfirmuar në detyrë prokurorin Dritan Nushi.
Braho tha se vlerësonte që Nushi kishte arritur nivel të besueshëm në të tre kriteret e rivlerësimit, duke u tërhequr nga ankimi i bërë nga institucioni i Komisionerëve Publikë.
Avokatja e Nushit, Romina Zano, dhe vetë prokurori, të pranishëm në seancë, falënderuan SPAK për tërheqjen nga ankimi, ndërsa parashtruan qëndrimin përfundimtar duke kërkuar po ashtu lënien në fuqi të vendimit të KPK-së.
Prokurori Nushi u konfirmua në detyrë më 31 janar, pasi shumica e trupës së Komisionit të Pavarur të Kualifikimit (KPK) arsyetoi se ai kishte arritur nivel të besueshëm për pasurinë dhe figurën dhe nivel kualifikues për profesionalizmin. Ndërsa pakica çmoi se subjekti gjendej në kushtet e deklarimit të pamjaftueshëm për pasurinë.
Ndërsa Komisioneri Publik ngriti shkaqe për profesionalizmin, pasurinë dhe etikën, për arsye të dijenisë për ndërtimin pa leje të një shtese nga ana e vjehrrit, në apartamentin ku ai banonte.
Pasi dëgjoi palët, trupa e KPA që po shqyrton çështjen njoftoi se do ta shpallte vendimin të mërkurën në orën 14:00.
