Pas më shumë se një dekade përdorimi për t’u dhënë bizneseve të afërta me pushtetin prona publike dhe pasuri strategjike të vendit, qeveria ka vendosur të shfuqizojë kontratat “1 euro”.
Mekanizmi që u përdor për të “falur” toka, ish-reparte ushtarake dhe prona në bregdet, po hiqet nga ligji i ri për koncesionet, që synon, sipas qeverisë, të sjellë më shumë transparencë, vendim ky që vjen pasi gjithçka e vlefshme është ndarë ndërmjet të përzgjedhurve të qeverisë Rama.
Drejtori i Agjencisë së Koncesioneve, Emiliano Gjika, deklaroi në Komisionin e Ekonomisë se neni për kontratat me 1 euro është hequr përfundimisht nga projektligji i ri “Për koncesionet dhe partneritetin publik-privat”.
“Në projektligjin e ri kemi hequr nga lista e koncesioneve pikën që ka qenë për kontratat simbolike me 1 euro,” tha Gjika.
Sipas draftit të ri, institucionet do të jenë të detyruara të publikojnë çmimin e ofertës, kriteret e përzgjedhjes dhe studimin e fizibilitetit për çdo kontratë, pas miratimit nga Ministria e Financave.
Zëvendësministrja e Ekonomisë, Blerta Rama, tha se ligji i ri “forcon kontrollin, rrit transparencën dhe unifikon procedurat” në përputhje me standardet e BE-së.
“Projektligji synon unifikimin e procedurave konkurruese; forcimin e kontrollit ex-ante dhe ex-post nga Ministria e Financave; garantimin e rregullave transparente për zbatimin dhe monitorimin e kontratave; menaxhimin e risqeve dhe ndarjen e tyre ndërmjet palëve; harmonizimin me standardet e BE-së; rritjen e rolit mbikëqyrës të Ministrisë së Financave, APP dhe ATRAKO si dhe promovimin e vlerës më të mirë për paranë dhe mbrojtjen e interesit publik”, tha zëvendësministrja e Ekonomisë dhe Inovacionit, Blerta Rama.
Por, ndërsa qeveria flet për “transparencë”, bilanci i kontratave të mëparshme mbetet i rëndë: me qindra hektarë tokë publike, prona shtetërore dhe pasuri strategjike janë dhënë për 1 euro tek biznesmenë të lidhur me pushtetin socialist.
Nga Dulaku te Gaz Demi, disa nga “fituesit” e kontratave 1 euro
Familja Dulaku
Përmes “Concord Investment”, e lidhur me televizionin proqeveritar Vizion Plus, ka marrë me qira për 20 vjet prona në Portin e Limjonit dhe në Sarandë, në bashkëpronësi me “Kastrati Group”, me një sipërfaqe totale mbi 270 mijë m².
Gjergj Luca
Biznesmeni i “Rozafa” shpk, mik i afërt i kryeministrit Rama, ka përfituar me “1 euro” prona në Elbasan, Gramsh, Përrenjas dhe Maliq, përfshirë ish-reparte ushtarake dhe depot e Rezervave të Shtetit, me qira 20-vjeçare.
Gaz Demi
Presidenti i klubit “Partizani” mori me qira Repartin Ushtarak nr.4030 në Tiranë, me sipërfaqe 37 mijë m², dhe pak muaj më pas emëroi Olsi Ramën, vëllain e kryeministrit, si drejtor të përgjithshëm të klubit.
Arbër Hajdari
Themeluesi i “Fundjava Ndryshe” dhe pjesë e stafit të Ramës, ka përfituar dy prona në Brar të Tiranës me sipërfaqe mbi 59 mijë m², përmes dy vendimeve qeveritare në vitet 2019 dhe 2024.
Carlo Bollino
Gazetari italian, pronar i Report TV, ka përfituar me qira ish-ndërmarrjen metalike “Tirana”, me sipërfaqe 4,900 m², për një periudhë 20-vjeçare.
Florenc Gjikuria
Përmes kompanisë “Gjikuria”, biznesmeni ka marrë 9 mijë m² në Gjilekë, Himarë, si pjesë e projektit “White Roads Hotel”, të shpallur investim strategjik.
LEXO EDHE:
Nga Dulaku e Gaz Demi, te Luca e Arbër Hajdari, ja kujt ia fali Rama Shqipërinë për “1 euro”
