Tensione janë regjistruar gjatë seancës së sotme plenare në Kuvend, ku mori fjalën për herë të parë, pas marrjes nën hetim nga SPAK, Belinda Balluku.
Teksa kjo e fundit po mbante fjalën deputeti Agron Shehaj po kundërshtonte vazhdimisht duke i kërkuar që të hiqte dorë nga pushteti.
Ai është futur live në rrjete sociale nga kuvendi, ndërsa po përsëriste se Balluku është një hajdute që ka vjedhur miliona lekë nga taskat e qytetarëve shqiptarë dhe sërish vazhdon të jetë në krye të qeverisë.
Në përgjigje, Balluku i tha Shehajt se nuk bëhet dot politikan me facebook ndërsa u shpreh se ky i fundit do të mbetet një pronar i vogël call centerave që nuk paguan as sigurimet për punëtorë.
Më pas situata ka eskaluar dhe Peleshi e ka përjashtuar Shehajn nga seanca plenare.
Pjesë nga debati
Balluku: Detyra e një opozitë duhet një ofertë politike. Është normale ndoshta për llojin tuaj që të bëni këtë lloj opozitë. Edhe ne do të dëshironim një opozitë më të mirë që nuk e ka luftën personale, por e ka ideologjike. Un jam pjesë e një sulmi që ka kohë që ka nisur. Ju nuk falni 8 humbje në 12 vite dhe me sulme personale mbuloni dështimin tuaj. Dikush u ngrit nga radhët tuaja tha të mos merremi me familjarët. Kur e vendosët këtë. Ju nuk merreni vetëm me familjarët, por keni sjellë në foltore edhe të vdekurit.
Shehaj: Hiq dorë nga pushteti, përballu me drejtësie!
Peleshi: Po prishni seancën. Po pengoni kolegët të flasin, keni marrë dy masa. Nëse thyeni rregulloren, unë jam i detyruar ta zbatoj rregulloren. Do të hiqet fjala për ditën e sotme. Ju hoqët e drejta e fjalës për ditën e sotme
Ndërhyn Shehaj dhe futet live në rrjetet sociale.
Balluku: Agron nuk bëhet politikan me selfie, do të duhet të dalësh në të të burrave dhe të fitosh, do të ngelesh pronari i call ceneter, që nuk paguan dot sigurimet shoqërore dhe i mban vajzat dhe djemtë me rrogë më pak se minimalja, nuk bëhesh politikan me Facebook, nuk jemi në call center këtu.
Peleshi: Zoti Shehaj dilni nga seanca!
