Nga Boldnews.al
“Nuk e di kush është skeptik. Mesazhi që kam për qytetarët e Shqipërisë është se kjo është falë punë suaj, ne jemi krah jush, por jeni ju ata që po jepni rezultate”, deklaroi komisionerja për zgjerim në BE, Marta Kos, para kryeministrit Edi Rama, ndërsa më pas shtoi fjalinë që nuk çuditi askënd, por ndoshta nxiti vetëm xhelozi nga ministrja Spiropali. “…tek Rama keni një udhëheqës që si kthehet së shkuarës për të gjetur pretekst pse diçka nuk bëhet”, tha Kos, teksa i referohej hapjes së kapitullit të fundit të negociatave mes Shqipërisë dhe BE-së.
Kos foli edhe për “sigurinë” që ofron Shqipëria. Madje shumë shpejt ajo pritet të vizitojë vendin tonë për të kaluar në të vetmen udhë nga Aeroporti Ndërkombëtar i Rinasit, aty ku pak ditë më parë çdo delegacion mund të ishte preh e plumbave të krimit të organizuar që vrasin dhe ikin nën hundën e drejtuesve të policisë, madje në shumë raste në bashkëpunim me ta. Dhe Kos që ende pyet sesi ka skeptik për qeverisjen Rama?!
Nuk duhet të ecë shumë gjatë për të kuptuar. Mjafton të shkojë në zyrat pranë të OLAF-it që urdhëruan ndërprerjen e fondeve të destinuara për bujqësinë shqiptare nëpërmjet IPARD, pasi panë abuzimin e madh nga ujqërit e Rilindjes të cilët shqyen çdo qindarkë që në letra ishte për bujqit dhe blegtorët në Shqipëri. Edhe nëse vjen në Tiranë për të ndarë “ecurinë mbresëlënëse” të qeverisjes me siguri Kos do të konsumojë një vaft drekë për të kuptuar se vjedhjet, madje edhe të fondeve të BE-së bëhet edhe nëpërmjet sallatës, apo salcës së kosit, siç është rasti i “Dosjes Beqja” me paratë e SASPAK-ut.
Në shenjë respekti dhe mirënjohjeje për reklamimin e një Shqipërie surreale, Rama mund ta shëtisë delegacionin e BE-së me në krye komisioneren Kos në bregdetin shqiptar. Do kalojë nga Tuneli i LLogarasë, aty ku me një të rënë lapsit zhduken mbi 50 milionë euro. Brukseli dhe Surreli janë dy koncepte tërësisht të ndryshme, jo vetëm gjeografike, por mbi të gjitha konceptuale. Megjithatë, dy botë të ndryshme nuk ndajnë qëndrim të përbashkët. Uji i Oqeanit Atlantik Trazon më shumë se Kos…!
Uashingtoni zyrtar ka vënë një barrierë të dukshme ndaj Ramës. Ka një vit që Rama nuk ka shkelur më në SHBA dhe si rrellherë në mbledhjen e OKB-së, kryeministri nuk ishte i pranishëm. Ujëra të tjerë kanë rrjedhur duke marrë përpara edhe skena groteske që as banorët e 313-ës nuk do i bënin, për të kuptuar se batutaxhiu që nënçmon presidentin Trump nuk po ngjit më.
Mund të bëjë të qeshin vetëm enturazhin personal me tru të larë, shpëlarë dhe kaluar në centi-(Fugën) e tij por zyrtarët teknicien të BE-së kanë tjetër qasje ndaj tij, duke mos ruajtur as për “etikë politike” një qëndrim korrekt në çështjen e diskutimeve për hapjen e negociatave Shqipëri-BE. Komisionerja për zgjerim Kos dhe zyrtarë të tjerë me mandat të përkohëshëm, përfshi edhe ambasadorë, shohin një tjetër Shqipëri, ndonëse faktet ulërasin më shumë se çdo propagandë e krijuar nga bindje surreale, apo e blerë me të mira metariale. Uashingtoni, Burreli dhe Surreli janë vite drite edhe më larg se paqet “fotovoltaike”.
