Vizita e Kryeministrit Edi Rama në qarkun e Elbasanit u shoqërua me tensione dhe protesta nga ana e qytetarëve. Rama u prit me protesta edhe në Cërrik, aty ku Rama zhvilloi edhe një dëgjesë publike me disa banorë.
Në atë që qeveria “Rama 2” e quan “procesi i llogaridhënies” me qytetarin, spikati banorja e fshatit Shtërmen të Bashkisë Cërrik, Bukurie Braka, e cila ia tha në sy Kryeministrit se Check-up-i i propaganduar nga qeveria ishte jo funksional.
Rama u acarua duke i hequr fjalën, ndërsa Braka e përsëriti se të dyja herët që kishte shkuar të bënte kontrollin parësor, nuk kishte gjetur as aparat tensioni. Fjala e Brakës u ndërpre duke ia lenë vendin batutave, por Fax News ka shkuar në banesën e saj në Cërrik.
Ajo ka thënë se pas mbledhjes ku ajo pyeti Kryeministrin për Check-up-in, është telefonuar nga kryetari i PS-së ku është pyetur pse ka pyetur për Check-upin dhe jo për legalizimet.
“Takimi me Kryeministrin ishte me skenar. Më thanë ta pyesja Kryeministrin për legalizimet. Një ditë para më legalizuan shtëpinë. E pyeta për Check-upin, më morën në telefon pas takimit. Kryetari i PS-së më pyeti pse e bëra atë pyetje… Më lanë në këmbë. Ma prenë fjalën se dola nga skenari”-shprehet ajo për Fax News.
Për më shumë ndiqni videon e mëposhtme:
Debati i Ramës me Bukurije Brakën në Cërrik:
Qytetarja: Një problem kisha unë me check-upin. Pse nuk përfshihen edhe analiza më të shtrenjta.
Checkup-i bëhet sa për të kaluar rradhën, dy herë që shkova unë s’kishte aparat tensioni…
Rama i heq fjalën…
Edi Rama: Jo, s’është për të kaluar radhën. Është Mamografia falas, paptesti falas…shko dhe bëje.
