Prokuroria e Posaçme ka dalë me një njoftim zyrtar për marrjen në pyetje të ish-kreut të Drejtorisë së Burgjeve, Agim Ismaili.
Isamili, i cili u pyet sot nga prokurorët e posaçëm për 90 minuta është marrë nën hetim si i dyshuar si pjesë e një grupi kriminal, që ka realizuar hakerimin e sistemit të SPAK.
“Sot, më 13.11.2025, shtetasi Agim Ismaili është marrë në pyetje në praninë e një avokati pasi ndaj tij po zhvillohen hetime për veprat penale:
Neni 293/a (paragrafi i dytë) – Përgjimi i paligjshëm i të dhënave kompjuterike;
Neni 333/a – Grupi i strukturuar kriminal; Neni 334 – Kryerja e veprave penale nga organizata kriminale dhe grupi i strukturuar kriminal”, njofton SPAK.
SPAK më 12 mars ishte në shënjestër të një ndërhyrje të paligjshme të adresave të email-eve të prokurorëve të posaçëm.
Për këtë ngjarje kanë përfunduar në pranga ish-punonjësi i IMT-së, Arnold Rrokaj dhe ish-zyrtari i burgut të Vlorës, Zambak Gjonaj.
Sipas hetimeve paraprake, hakerat kanë tentuar të marrin informacion nga kompjuterët e tre prokurorëve të posaçëm Behar Dibra, Enkeleida Millonai dhe Elida Kaçkini.
Dy personat e arrestuar dyshohet se kanë shpërndarë dokumente të siguruara nga sulmi kibernetik te persona të tjerë.
