Gazetarja Klodiana Lala ka dhënë detaje në lidhje me atentatin që ndodhi ditën e djeshme në Rinas ku u vra Gilmando Dani dhe u plagos Muçi Shaljani (Sheqeri).
Lala thotë se ka dyshime që atentati të ketë ndodhur për larje hesapesh. Sipas saj vrasje ishte një mesazh për Emiljano Shullazin nisur nga fakti që Dani konsiderohej si krahu i djathtë i tij.
Sipas Lalës, duke qenë se Shullazin nuk e arrinin dot, pasi ndodhet në qeli, autorët janë hakmarrë tek krahu i tij i djathtë. Ajo thotë se Dani mund të jetë tradhtuar nga një person i afërt që ka ditur itinerarin e tij.
“Besohet se mesazhi dhe objektivi ka qenë Emiljano Shullazi, por duke mos pasur mundësi për të arritur tek ai, janë hakmarë tek njeriu i afërt i tij, Gilmando Dani. Dani mund të jetë tradhtuar nga njerëzit e afërt të tij. Më 7 nëntor ka udhëtuar drejt barcelonës, teksa autorët kanë pasur informacion për çdo lëvizje të tij. Ata kishin informacion aq të saktë sa kanë pritur te rrethrrotullimi të qetë, në pritje të tij, duke e ditur se do kalonte aty. Ata e dinin se Dani ishte i ulur pikërisht në vendin e pasagjerit, ku dhe drejtohen plumbat. Autorët kanë vepruar si paramilitarë, njëri qëllim dhe tjetri i mbron krahët. Kanë vepruar si komando, e ndihmon me armën, e pret derisa mbaron sulmin. Dani është tradhtuar nga njerëzit që ka takuar. Janë qëlluar deri në 80 plumba. Atentatorët kujdesen edhe të mos lënë gjurmë, duke mbledhur gëzhoja e plumba”, tha gazetarja sot në “News 24”.
