Një protestë kundër ligjit që njeh më shumë se një gjini po mbahet sot para Parlamentit, pak para se ligjvënësit të votojnë projektligjin.
Protestuesit shprehen shqetësimin se ligji kërcënon familjen tradicionale dhe prezanton gjini të reja të paqëna, duke rrezikuar të krijojë konfuzion dhe të ndikojë negativisht te rinia shqiptare.
Në protestë ishte e pranishme edhe Lindita Pano, bashkëshortja e pastorit Akil Pano. E pyetur nga gazetarja e Top News mbi reagimin e Komisioneres për Zgjerimin e BE-së, Marta Kos, e cila kishte deklaruar më parë se ligji është një detyrim për rrugën drejt BE-së, zonja Pano u shpreh:
“Jo, nuk është e vërtetë. Askush nuk të detyron. Ne jemi një vend sovran që kemi traditat tona. 21 vende të Bashkimit Europian nuk e kanë këtë ligj,” tha ajo.
Protestuesit kërkojnë që ligjvënësit të reflektojnë mbi ndikimin social dhe kulturor të projektligjit para se të marrin një vendim.
