Forcat amerikane kanë ndërmarrë një tjetër operacion detar kundër trafikut të drogës në Oqeanin Paqësor, ku janë vrarë 14 persona dhe dy të tjerë janë raportuar të humbur. Njëri prej tyre është shpëtuar nga autoritetet meksikane të kërkim-shpëtimit, sipas Sekretarit të Mbrojtjes, Pete Hegseth.
Sipas tij, katër anijet e goditura ishin identifikuar më parë nga shërbimet e inteligjencës amerikane si pjesë e rrugëve të njohura të trafikut të narkotikëve dhe po transportonin sasi të konsiderueshme droge. “Departamenti ka kaluar mbi dy dekada duke mbrojtur atdhe të tjerë. Tani po mbrojmë tonin,” shkroi Hegseth në rrjetin X.
Operacioni, i cili u zhvillua të hënën me urdhër të Presidentit Donald Trump, është pjesë e një fushate të gjerë amerikane kundër trafikantëve të drogës, si në Karaibe ashtu edhe në Paqësor. Të paktën 51 persona janë vrarë deri më tani në këto sulme, që kanë shtuar tensionet midis SHBA-së dhe disa qeverive të Amerikës Latine, përfshirë Kolumbinë dhe Venezuelën.
