Kreu i Grupit Parlamentar i PS Taulant Balla kërkoi 15 minuta pushim të seancës plenare, për t’u takuar me opozitën dhe për të dakordësuar vijim e seancës dhe raportimin e drejtuesve të institucioneve të drejtësisë.
Balla tha se nëse opozita nuk bie dakord që pyetjet për drejtuesit të bëhen me shkrim, jo me gojë siç kërkon opozita, atëherë do të kërkojë që kjo seancë maratonë të kalojë direkt në votim.
“Në mungesë të kryetarit të grupit, zoti nënkryetar Belind Këlliçi, kërkesa juaj për të shkelur rregulloren, as sot as pa një muaji nuk do e marrë dakordësimin tonë. Kërkoj 15 minuta pushim për një bisedë bashkë me ju dhe kryetarët e grupeve prezentë, nëse s’do kemi dakordësinë tuaj për të vijuar, do kërkoj ndërprerje të diskutimeve dhe kalim në votim”, tha Balla.
Pas mbledhjes që zgjati rreth një orë, palët janë dakordësuar që do të respektohet rregullorja dhe pyetjet do të lexohen nga drejtuesi i institucionit, me të drejtë komenti 2 minuta nga deputetët.
PD ka depozituar 57 pyetje për SPAK, 25 për Prokurorinë e Përgjithshme dhe 18 për ILD.
