Situata në fshatin Mali i Rëzuar, pjesë e Bashkisë Vau i Dejës, është përshkallëzuar ndjeshëm pas daljes nga shtrati të lumit Gjadër.
Sipas raportimeve nga vendngjarja dhe dëshmive të banorëve, lumi ka përmbytur tokat bujqësore dhe po afrohet rrezikshëm drejt shtëpive.
Banorët kanë ngritur alarmin publik, duke denoncuar mungesën totale të reagimit nga institucionet përgjegjëse. Asnjë përfaqësues nga emergjencat civile apo nga Bashkia Vau i Dejës nuk është paraqitur në terren, pavarësisht përkeqësimit të situatës nga ora në orë.
Në një deklaratë për JOQ një banor tha: “Jam banor i fshatit Mali i Rrëzuar. Fotot që kam dërguar janë të lumit Gjadër që prek tokat dhe rrezikon shtëpitë dhe banorët e fshatit. Asnjë person nga emergjencat civile apo përfaqësues i Bashkisë nuk ka ardhur ende për të parë situatën.”
Kjo heshtje institucionale është cilësuar nga banorët si shenjë e mungesës së përgjegjësisë, ndërkohë që lumi vazhdon të përparojë duke rrezikuar jetën dhe pronën e tyre.
Ata kërkojnë ndërhyrje urgjente për të forcuar brigjet e lumit dhe për të ndërtuar pritë mbrojtëse, pasi rrezikohen mbi 80 familje në zonë.
