Një operacion i gjerë antidrogë i zhvilluar nga Guardia di Finanza ka goditur një organizatë kriminale me bazë në Shqipëri, e cila dyshohet se ka drejtuar një rrjet të trafikut ndërkombëtar të lëndëve narkotike.
Në kuadër të këtij hetimi, autoritetet italiane kanë arrestuar 15 persona, duke shkatërruar një strukturë të mirëorganizuar me lidhje të forta me krimin e organizuar në Itali dhe Shqipëri.
Sipas mediave italiane, organizata kriminale ishte e armatosur dhe e specializuar në trafikimin e kokainës nga Amerika e Jugut drejt Europës. Për të shmangur zbulimin, grupi përdorte sisteme të sofistikuara komunikimi me mesazhe të koduara, duke mbajtur kontakte të drejtpërdrejta me anëtarë të bandave në rajonin e Kampanias dhe në Shqipëri.
Brenda një periudhe prej pak më shumë se 12 muajsh, ky rrjet dyshohet se ka transportuar kokainë me vlerë mbi 18 milionë euro, e cila më pas është shpërndarë në qendrat kryesore të trafikimit të drogës në rajonin e Lombardisë.
Kërkimet dhe bastisjet po vazhdojnë në provincat e Milanos, Pavias dhe Reggio Calabrias, me mbështetjen e njësive speciale të policisë dhe qenve të trajnuar për nuhatjen e drogës. Operacioni ka nxjerrë në pah jo vetëm përmasat e trafikut, por edhe nivelin e sofistikimit dhe koordinimit ndërkombëtar të organizatave kriminale që veprojnë përtej kufijve.
