Kreu i SPAK, Altin Dumani, raportoi sot në Komisionin e Ligjeve dhe Nismat Qytetare për veprimtarinë e institucionit gjatë vitit 2024.
Dumani bëri me dije se gjatë vitit të kaluar janë sekuestruar 65.5 milion euro pasuri, duke përfshirë pasuri të paluajtshme, llogari bankare dhe kriptovaluta, një rritje prej 60% krahasuar me vitin 2023.
“Gjatë vitit 2024 SPAK ka patur ndjekjen e rekomandimeve të BE, rezolutës së Kuvendit dhe rekomandimeve prioritare të Këshillit të Ministrave në luftën kundër korrupsionit dhe kriminalitetit. Numri i prokurorëve u rrit në 20, u rritën edhe trajnimet ndërkombëtare. U rritën me 8% çështjet në hetim. Në nëntor 2024 u miratua udhëzimi për masat administrative dhe procedura për kryerjen e hetimit pasuror dhe financiar, që i zhvillon paralelisht me hetimin penal. Gjatë vitit 2024, janë sekuestruar 65.5 milionë euro, një rritje me 60% krahasuar me 2023, duke përfshirë pasuri të paluajtshme, bankare dhe kriptovaluta”, raportoi Dumani.
Ai theksoi se 33 zyrtarë të lartë janë hetuar për korrupsion dhe se SPAK ka arritur rezultate edhe në luftën kundër trafikut të drogës dhe pastrimit të parave. Gjithashtu, sipas Dumanit, 128 kërkesa nga publiku janë dërguar për hetime gjatë vitit 2024.
“Sa i takon korrupsioni, gjatë vitit 2024 treguesit tregojnë një tendencë në rritje të luftës kundër korrupsionit të funksionarëve publikë. Këto të dhëna tregojnë se nga totali i çështjeve në hetim, vetëm rreth 5.9% janë kërkuar të pushohen dhe 12.3% janë transferuar në Prokurorit e Juridiksionit të Përgjithshëm, rreth 1% janë pezulluar ndërsa rreth 67.4% të çështje mbeten pjesë e hetimeve për vitin 2025.
Në vitin 2024 janë 10 funksionarë të lartë për të cilët ka pasur vendimi të gjykatave që kanë marrë formë të prerë. Për sa iu takon matjes së nivelit të rriskut, tregojnë nivel të lartë dhe të qëndrueshëm rreziku, zgjerimi në disa kategori krimesh dhe me ndikim të drejtpërdrejt në qeverisjen publike, integritetin institucional dhe ekonominë kombëtare.”, tha Dumani.
