Gjykata e Posaçme kundër Korrupsionit dhe Krimit të Organizuar (GJKKO) ka rrëzuar kërkesën e Ermir Ndreajt për ndryshimin e masës së sigurisë.
Vendimi është dhënë nga gjyqtari Erjon Bani, duke lënë në fuqi masën e arrestit në burg për biznesmenin e njohur.
Ndreaj, i arrestuar nga SPAK, akuzohet për trafikim të narkotikëve në sasi të mëdha, konkretisht rreth 6 tonë drogë që dyshohet se janë trafikuar drejt vendeve të Bashkimit Europian.
Në seancën gjyqësore, i pandehuri kërkoi zbutjen e masës së sigurisë, duke argumentuar se vuante nga probleme shëndetësore, por kërkesa e tij nuk u pranua nga trupa gjykuese.
Ermir Ndreaj është i njohur për jetën e tij luksoze dhe aktivitetin në fushën e biznesit, si pronari i disa kompanive dhe restoranteve të luksit në Tiranë dhe qytete të tjera. Ai ka qenë gjithashtu pronar i “Cinco Cavalli”, një ndër klubet më të njohura të jetës së natës në kryeqytet.
Ermir “Cinco” Ndreaj, i arrestuar në korrik në Tiranë, po përballet me kërkesë për 20 vite burg nga drejtësia belge. Në pranga u vunë vëllezërit biznesmenë Artur dhe Klevis Hoxhosmani, dhe biznesmeni Ilir Lloshaj. SPAK e zbërtheu grupin kriminal në saj të komunikimeve në Sky Ecc dhe Encrochat. Ishte hetimi që Prokuroria e Posaçme kishte nisur për grupin kriminal që kishte planifikuar atentatin ndaj ish-Prokurorit Arjan Ndoja që çoi në zbulimin e grupit që mbushi me kokainë gjithë Europën. Emra të njohur të botës së krimit, si Palurent Dervishaj, i penduari Erion Alibej, por edhe Hoxhosmani apo bosi i ‘Cincos’, Ermir Ndreaj, ishin pjesë e grupit me 16 anëtarë në total që trafikuan të paktën 6 ton kokainë, me vlerë tregu 411 milionë euro.
