Një deklaratë e bërë nga ministri i Drejtësisë, Besfort Lamallari, në Kuvend, sipas së cilës ligji 7501 u miratua nga Partia Demokratike, ka shkaktuar debat të fortë në Komisionin e Ligjeve. Deputeti i PD-së, Ivi Kaso, tha se Lamallari duhej të fillonte fjalimin e tij me një ndjesë publike, duke e akuzuar atë për dezinformim.
“Ministri ka pretenduar se ligji 7501 është miratuar nga PD, dhe kjo nuk është e vërtetë. Përfaqësimi i tij si ministër e bën këtë deklaratë të rëndësishme për opinionin publik,” tha Kaso.
Lamallari e justifikoi mashtrimin duke thënë që e ka dëgjuar në media
Opozita ngriti edhe shqetësimin për mënyrën se si përdoret paraburgimi në Shqipëri.
Lamallari pranoi se problematika është reale dhe theksoi se qasja ndaj paraburgimit duhet të ndryshojë rrënjësisht duke i dhënë kështu një “shuplakë” fytyrës liderit të tij Rama, i cili shpeshherë thotë ti fusin në burg të gjithë, madje edhe ata që nuk paguajnë energjinë elektrike.
Lamallari tha se “një nga padrejtësitë më të mëdha është që të shpenzosh kohë në paraburgim më shumë se koha që gjykata vendos në vendim përfundimtar”, duke shtuar se burgu duhet të shihet si mjeti fundit, kur plotësohen kushtet e rrezikshmërisë.
Oerd Bylykbashi: Çfarë masash do marrë qeveria që të ndryshojë qasjen në lidhje me mënyrën se si përdoret paraburgimi?
Besfort Lamallari: Një nga padrejtësitë më të mëdha është që të shpenzosh kohë në paraburgim më shumë se koha që gjykata vendos në vendim përfundimtar. Kjo duhet adresuar. Kjo ka të bëjë edhe me mënyrën si janë shkruar dispozitat, por edhe me zbatimin e tyre në praktikë. Burgu duhet të shihet si mjeti i fundit, kur plotësohen edhe kushtet e rrezikshmërisë. Kjo kërkon ndërgjegjësim të gjithë aktorëve përkatës, prokurorive dhe gjykatave, këtu vjen në ndihmë edhe roli i partnerëve.
