Kandidati i pavarur për Bashkinë e Tiranës, Florjan Binaj, i mbështetur nga opozita, ka reaguar këtë të enjte pas vendimit të Gjykatës Kushtetuese për pezullimin e vendimit për shkarkimin e kryebashkiakut Erion Veliaj.
Në një deklaratë publike, Binaj e cilësoi këtë zhvillim si një hap të parë drejt një rrugëtimi të gjatë për ndryshim në kryeqytet.
Ai konfirmoi pjesëmarrjen në zgjedhjet e pritshme, duke theksuar se fushata e tij do të bazohet në vizionin për një politikë të ndershme dhe të përkushtuar ndaj qytetarëve.
“Kurdo që të caktohet votimi, ne do të marrim pjesë me vizionin dhe vullnetin tonë për ndryshim,” u shpreh Binaj. “Deri atëherë ju ftoj të punojmë çdo ditë për të ndezur në mendjet dhe zemrat e qytetarëve besimin tek politika e ndershme, tek politika e punës, besimin se pushteti buron nga qytetarët dhe duhet të punojë vetëm për qytetarët.”
Ai e mbylli mesazhin me thirrjen: “Partia më e rëndësishme, partia më e fuqishme në botë është partia e qytetarëve.”
