Tre të arrestuarit për ngjarjen e rëndë në Gjykatën e Apelit Tiranë, ku mbeti i vrarë gjyqtari Astrit Kalaja, do të dalin sot para Gjykatës së Shkallës së Parë në Tiranë për t’u njohur me masën e sigurisë.
Në bankën e të akuzuarve do të jenë Elvis Shkambi, autori i dyshuar i vrasjes, xhaxhai i tij Gjon Shkambi, si dhe roja e sigurisë së gjykatës, Banush Koxhaj. Seanca pritet të zhvillohet me dyer të mbyllura në Dhomën Penale të Gjykatës.
Prokuroria e Tiranës ka kërkuar masën e sigurisë “arrest me burg” për të tre të ndaluarit. Elvis Shkambi, 30 vjeç, akuzohet për vrasjen e funksionarit publik, vrasje në rrethana cilësuese ndaj palëve të përfshira në proces, kryer në bashkëpunim dhe mbetur në tentativë, si dhe mbajtje pa leje të armëve dhe municioneve luftarake.
Konflikti mes familjeve Shkambi dhe Kurtaj kishte nisur për një pronë në Shkodër. Sipas Prokurorisë, Gjon Shkambi kishte dijeni për planin e nipit dhe dyshohet se e ka nxitur për të sulmuar babë e bir, Rakip dhe Ervis Kurtaj, të cilët u plagosën në ngjarjen tragjike.
Ndërkohë, punonjësi i sigurisë Banush Koxhaj akuzohet për shpërdorim detyre, pasi nuk ka ndërhyrë në momentin kur detektorët e metaleve sinjalizuan praninë e armëve. Ai nuk ka kryer kontroll fizik ndaj të dyshuarve dhe as nuk i ka regjistruar në librin e protokollit, siç e kërkon procedura për hyrjet në ambientet e gjykatës.
